OÉ-CUSSE, 20 Dezembru 2024 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Rogério Tiago Lobato, hala’o vizita bá komunidade iha suku Usitaqueno, sub-rejiaun Oésilo.
Objetivu husi vizita ne’e atu haree direta kondisaun no rona preokupasaun populasaun nian iha suku referidu tanba fatin ne’e iha poténsia ba frutikultura no ortikultura.
Iha ámbitu vizita ne’e, xefe suku Usitaqueno, Francisco Elo, dehan prezensa autoridade RAEOA ne’e rona direta lamentasaun komunidade nian kona-ba asesu ba estrada hodi lori produtu bá merkadu.
“Suku Usitaqueno iha poténsia barak ba ai-nanas, has, abakate, ai-farina, modo, lis-mean no lakeru-mutin, maibé difikuldade boot ba ami mak kondisaun estrada maioria aat. Komunidade esforsu dalaruma to’o merkadu, maibé produtu sira-ne’e ladún folin”, autoridade lokál ne’e dehan.
Notísia relevante:Suku Usitaqueno husu MAP kria merkadu ba produtu ne’ebé prodús hosi HAPAS
Líder komunitáriu ne’e salienta katak plantasaun ai-ananas iha suku Usitaqueno besik ektare 15 no Bobometo iha ektare 40, maibé lori bá merkadu ladún hetan lukru di’ak, tanba ema ladún sosa.
“Tanba ne’e, husu na’i pezidente autoridade se bele kria polítika, nune’e ami-nia produtu sira bele folin iha merkadu”, nia rekomenda.
Hatán ba rekomendasaun ne’e, Prezidente Autoridade RAEOA, Rogério Tiago Lobato, dehan poténsia iha suku Usitaqueno mak kuda ai-ananas, tanba ne’e nia kompromete sei buka dalan oinsá bele kria merkadu ba ai-ananas nian iha Oé-Cusse.
“Ha’u sei buka meiu atu lori fábrika ai-ananas nian hodi investe iha Oé-Cusse. Importante mak ne’e, ita tenke halo produsaun barak liután, imi tenke kuda barak, labele para, kontinua kuda tan ho produtu seluk”, nia hateten.
Rogério Lobato fó hanoin mós ba xefe suku sira atu organiza komunidade hodi kria grupu no harii sentru kooperativa hodi hanaran kooperativa ai-ananas iha suku, nune’e bele hetan apoiu ekipamentu no hetan formasaun husi Governu no parseiru dezenvolvimentu sira.
“Ha’u husu xefe suku atu organiza komunidade halo grupu hodi harii sentru ida, nune’e ha’u bele apoia materiál kuda ai-ananas nian no ha’u sei apoia uluk foos saku 20 hodi organiza malu halo diskusaun. Tuirmai mak ita fó tulun tan materiál kuda ai-ananas nian, tanba suku ne’e iha produtu barak, maibé seidauk organiza didi’ak hodi hasa’e produsaun lori bá merkadu sira”, nia dehan iha komunikadu ne’ebé Tatoli asesu, ohin.
Notísia relevante: Jestór Oésilo promete defende povu atu asesu fasilidade Estadu
Sub-rejiaun Oésilo akumula aldeia 13 husi suku tolu mak Usitaqueno, Bobometo no Usitasa’e. Tuir Sensu Populasaun 2022, suku Usitaqueno akumula uma-kain 306 ho totál populasaun hamutuk 1.233.
Jornalista: Abílio Elo Nini
Editora: Maria Auxiliadora
