BOBONARO, 23 dezembru 2024 (TATOLI) – Ministru Administrasaun Estatál (MAE), Tomás do Rosário Cabral, segunda ne’e ofisialmente halo inaugurasaun ba salaun inkontru Maria-Tapo no jardín iha edifísiu Autoridade Munisípiu Bobonaro ne’ebé hetan kedas bensaun husi Padre Pároku Santa Kruz Maliana, Valerio Gusmão.
Infraestrutura ne’e konstrui liuhusi projetu Planu Integradu Dezenvolvimentu Munisipál (PDIM) 2022 no 2024.
‘Espera salaun ida-ne’e bele fasilita ita-boot sira nia servisu,” Ministru Tomás do Rosário Cabral, hato’o iha intervensaun ba serimónia ne’e.
Prezidente Autoridade Munisípiu Bobonaro, Alexandrino Pires, esplika salaun Maria-Tapo nu’udar obra ne’ebé konstrui husi mandatu PAM sesante, Ernesto de Oliveira Barreto.
‘’Saida mak halo di’ak ita kontinua nafatin no saida mak ladi’ak ita hadi’ak ba povu munisípiu Bobonaro,” nia katak.
Enkuantu pojetu konstrusaun jardín no paving block ne’e konstrui ho orsamentu hamutuk $8,947,82 no montante ne’e finansia husi orsamentu poupansa projetu PDIM 2024 no projetu konstrusaun salaun Maria-Tapo ne’e mós inklui iha orsamentu reapropriasaun PDMI 2024 ne’ebe governu aloka husi totál milaun $2-resin ne’e.
Notísia relevante: PAM Bobonaro lansa projetu PDIM 2024
Jornalista: Sérgio da Cruz
Editór: Evaristo Soares Martins
