BOBONARO, 24 dezembru 2024 (TATOLI) – Polísia Nasionál Timor-Leste (PNTL) munisípiu Bobonaro hamutuk ho FALINTIL-Forsa Defeza Timor-Leste (F-FDTL) destakadu postu Tunubibi no Unidade Patrullamentu Fronteira, Batallaun Orden Públika, realiza parada militár hodi formaliza operasaun seguransa konjunta ba asegura selebrasaun festa Natál no tinan foun 2025.
Komandante PNTL Munisípiu Bobonaro, Superintendente Xefe Agustino Gomes da Silva, infoma, parada ne’e nu’udar kontinuasaun husi parada ne’ebé prezide husi Xefe Estadu Maiór F-FDTL, Tenente Jenerál Domingos Raul ‘Falur Rate-Laek’ iha Kuartél Unidade Espesiál Dili, iha loron 20 dezembru.
Komandante ho diviza ai-funan tolu ne’e, afirma iha operasaun konjunta ne’e PNTL ho F-FDTL sei halo asaun ne’ebé firme, rigorozu, profisionál bazea ba lei no respeita direitu umanu, maibé sei la tolera kualkér grupu ka individu ne’ebé tenta perturba seguransa no orden públika durante períodu Natál no tinan foun 2025.
Líder másimu Komandu PNTL Munisípiu Bobonaro ne’e apela ba komunidade hotu iha kapitál Maliana no postu administrativu lima seluk atu hamutuk garante paz no estabilidade nune’e bele festeza eventu importante ne’e ho kondisaun seguru konduzivu no hakmatek.
Notísia relevante: Polisia Bobonaro Implementa Planu Operasaun “Alerta Um”
Nia dehan, komunidade sira sunu fogete hafoin selebrasaun Natál iha loron 24 kalan no 31 dezembru, maib fora husi ne’e sei atua tuir lei ne’ebé vigora.
Relasiona ho orden ne’e, Superintendente Xefe Polísia ne’e fó hanoin ba inan-aman sira atu labele eduka oan sira sunu fogete, tanba konsidera perturba ema-nia trankuilidade.
“Ita-nia forsa seguransa sei aprosima no informa ba inan-aman sira atu obedese ba orden ne’ebé autoridade seguransa fó, sé la kumpri sei halo akuzasaun ho kódigu penál artigu 244 sobre dezobediénsia ho ameasa kadeia tinan rua ho multa,’’ nia hakotu.
Enkuantu patrullamentu konjunta ne’e sei abranje to’o nível postu administrativu sira hanesan Atabae, Balibo, Cailaco, Bobonaro no Lolotoe.
Notísia relevante: PNTL Bobonaro husu komunidade mantein páz iha loron finadu
Jornalista: Sérgio da Cruz
Editór: Evaristo Soares Martins