DILI,23 dezembru 2019 (TATOLI)-Komandu Polisia Nasionál Timor-Leste, Munisípiu Bobonaro, segunda (23/12) ohin, ofisializa implementasaun ba planu operasaun hanaran “alerta Um”, ba komunidade atu fó apoiu hodi asegura situasaun ida hakmatek ba komunidade, durante selebrasaun loron boot natal 2019, no tinan-foun 2020 iha Munisípiu ne’ebé lokaliza iha froteira ho Indonézia ne’e.
Komandante PNTL, Munisípiu Bobonaro, Superintendente Xefe Polisia, Octávio Bucar de Araújo, hateten, planu operasaun alerta ida ne’e hahú implementa hosi loron 23 fulan-dezembru, no sei remata iha loron 05 fulan-janeiru 2020.
Polisia Bobonaro, ohin ofisializa planu ne’e, hafoin halo enkontru kordenasaun ho Komandante FALINTIL-FDTL, Kompañia Charlie hosi Postu Tunubibi, Kapitaun Francisco Silva, Komandante Batallaun Ordém Públiku (BOP), Inspetór Polisia, Rosalino dos Santos, Polisia Unidade Fronteira (UFP), Xefe Suku Holsa, Odomau, Ritabou, Lahomea, Memo, Saburai, no autoridade munisipál iha salaun enkontru PNTL Bobonaro.
“Ami implementa ona alerta UM, tanba ne’e la tolera ema halo krime,”informa Superintendente Xefe Polisia, Octávio Bucar de Araújo, ba TATOLI via telefone, ohin.
Komandu PNTL Bobonaro iha nia membru polisia hamutuk 150-resin, kompostu hosi unidade Task Force, Forsa Rezerva, Ofisiál Polisiamentu Suku (OPS) no seluk tan maka dadaun ne’e destaka iha eskuadra Maliana, Bobonaro, Cailaco, Balibo, Atabae no Lolotoe.
Nia parte mós hetan tulun hosi FALINTIL-FDTL no Polisia Unidade Fronteira tanba ne’e sei reforsa di’ak liután atividade patrullamentu no movimentu iha komunidade nia leet hodi mantein páz no estabilidade.
“Xefe Suku sira mós promete ona sei tulun polisia hodi asegura seguransa ba komunidade,”tenik tan.
Komandante Polisia Munisípiu Bobonaro ne’e apela ba komunidade hotu-hotu atu kolabora no kordena ho polisia hodi asegura situasaun ida páz ba komunidade hodi selebra festa boot rua, natal no tinan foun.
Jornalista:Agapito dos Santos
Editór :Francisco Simões
