DILI, 26 dezembru 2024 (TATOLI)- Komandante Polísia Nasionál Timor-Leste (PNTL) Munisípiu Dili, Superintendente Xefe Polísia Orlando Gomes, hateten, durante selebrasaun natál, husi loron 24 to’o 25 fulan-dezembru 2024, Komandu PNTL Dili detein suspeitu na’in-21 tanba envolve iha krime danu ho violénsia no obstrusaun ba autoridade.
“Totál suspeitu sira ne’ebé Komandu Munisípiu Dili durante iha dia 24 ho 25, detein kuaze ema na’in-21. Agora daudaun sira iha hela sela depois ita aprezenta ona ba Ministériu Públiku hodi prosesu kontinuasaun,” Superintendente Xefe Polísia Orlando Gomes hateten ba jornalista sira iha nia knaar fatin Eskuadra Dom Aleixo, kinta nee.
Autoridade polisiál ne’e, esplika, iha dia 24, mosu krime danu ho violénsia ne’ebé akontese iha merkadu Taibesi. Nune’e Polísia asegura ema na’in-10 maibé depois halo tiha identifikasaun ba sira ne’e, iha ema na’in rua mak sai hanesan autór prinsipál ba kazu ne’e no oras ne’e daudaun suspeitu na’in rua detein ona iha sela detensaun Komandu PNTL Dili hodi kumpri oras 72 molok aprezenta ba Ministériu Públiku.
Nune’e mós iha dia 24 kalan mosu kazu obstrusaun autoridade públika iha Lahane, suspeitadu iha grupu joven sira asalta hodi baku servisu sekretu F-FDTL ida ho akontesimentu ne’e Taskforce hamutuk ho eskuadra Na’in Feto ho operasaun konjunta halo kedan apriensaun ba joven sira ne’e no besik ema na’in-17 lori mai Komandu PNTL Dili hodi halo identifikasaun.
Nia dehan, suspeitu na’in-17 ne’e iha nain rua mak minoridadade, PNTL liberta tiha kedan haruka fila ba uma no na’in-15 mak detein iha sela hodi submete ba 72 oras depois aprezenta ba Ministériu Públiku.
Superintendente Xefe Polísia Orlando Gomes hateten, iha dia 25 mosu kazu Danu Simples ida iha Bebonuk, suspeitu tenta hemu lanu ba baku Xineza ida to’o oklu rahun no suspeitu momentu ne’e Polísia halo kedan kapturasaun lori mai kedan iha Komandu hodi detein kedan iha sela detensaun kumpre oras 72.
Iha loron 25 mosu kazu arma branka ne’ebé akontese iha Fomentu II, kazu ne’e la’ós grupu, maibé nee kazu individuál, suspeitu na’in rua uza Samurai atu taa vítima no patrulla Eskuadra Dom Aleixo to’o kedan iha fatin halo kedan kapturasaun ba suspeitu na’in rua ne’e lori kedan mai iha Komandu PNTL Dili hodi halo detensaun.
Komandante Munisípiu Dili ne’e mós fundamenta katak iha loron 25 fulan-dezembru mosu tan kazu ofensas integridade fízika simples ho Danu simples ne’ebé mak akontese iha Hera Postu Administrativu Cristo Rei no PNTL detein suspeitu na’in ida ba kazu ne’e.
“Totál suspeitu sira ne’ebé ita detein iha dia 24 to’o 25 fulan-dezembru foin daudaun ne’e mak hamutuk ema na’in-21. Sira ne’e agora detein ona iha sela detensaun,” nia adianta.
Autoridade seguransa interna ne’e dehan, fukun loloos husi kazu akontese primeiru joven sira lanu hafoin sira ho sira iha odiu no vigansa partikular tuirmai aproveita loron boot sira konsumu álkool depois halo problema.
Jornalista: Natalino Costa
Editór: Rafael Ximenes de A. Belo
