DILI, 03 janeiru 2025 (TATOLI)—Institutu Nasionál Estatístika Timor-Leste, Institutu Públiku (INETL, I.P), lansa relatóriu mensál kona-ba mudansa persentajen Índise Presu Konsumidór (IPK) novembru 2024.
Relatóriu ne’e hatudu grupu hotu tun ba -0,2%, hanesan mós ho outubru 2024 tun ba -0,2%.
“Mudansa presu grupu hotu -0,2% tanba hetan kontribuisaun husi grupu hahán no bebida la’ós alkólika -0,4%, ekipamentu no manutensaun mobiláriu uma-laran -0,2%, no transporte -0,1%,”referidu nota ne’ebé Agência Tatoli asesu, sesta ne’e.
Grupu Alkólika no tabaku sa’e +0,2%, enkuantu ba hatais no sapatu +0,2% sai hanesan mudansa kontráriu ba inflasaun grupu hotu.
Grupu hahán no Bebida la’ós alkólika tun -0,4% tanba hetan impaktu maioria husi sub grupu modo tahan -1,3%, masin midar, marmelada, bani-ben, xokolate no hahán midar -2,1%, foos -0,2%, ikan no hahán tasi -0,4% no susubeen, keiju no manu-tolun -0,3%.
Notísia relevante : IPK grupu hotu sa’e +0,4% iha abríl 2024
Ba sub grupu mina no bokur sa’e +0,2% no ai-fuan +0,1% sai hanesan mudansa kontráriu ba inflasaun grupu hahán no bebida la’ós alkólika.
Mudansa persentajen IPK anuál tun -0,2% kompara entre novembru 2024 no novembru 2023, hetan kontribuisaun husi grupu transporte -2,4%, alkólika no tabaku -3,8%, ekipamentu no manutensaun mobiláriu uma-laran -1,3%, uma -1,1% no Komunikasaun -0.9% ba anuál novembru 2024.
Grupu hahán no bebida la’ós alkólika +0,5%, hatais no sapatu +1,0%, edukasaun +2%, saúde +2,3%, no rekreasaun no kultura +1,9% sai hanesan mudansa kontráriu ba inflasaun grupu hotu ba anuál novembru 2024.
Inflasaun tradeable tun ba -0,3% no non-tradeable laiha mudansa 0,0% iha mensál, kompara entre novembru no outubru 2024.
Inflasaun tradeable tun -0,5% no non-tradeable sa’e +0,5% iha anuál, kompara entre novembru 2024 no novembru 2023.
Jornalista : Arminda Fonseca
Editora : Julia Chatarina