OÉ-CUSSE, 06 Janeiru 2025 (TATOLI) – Diresaun Nasionál Terra no Propriedade (DNTP) Rejiaun Administrativa Espesiál Oé-Cusse Ambeno (RAEOA), rekolla, entre Janeiru no Dezembru 2024, reseita ba kofre Estadu hamutuk $14.896.
Diretór Terra no Propriedade Oé-Cusse, Júlio Coel, dehan reseita sira ne’e mai husi arrendamentu rai no uma Estadu, tanba durante ne’e Terra no Propriedade selebra kontratu arrendamentu ho sidadaun sira-ne’ebé uza propriedade Estadu hamutuk 220, maibé balun nia kontratu termina ona no seluk ladún ativu.
“Sira-ne’ebé ativu nafatin ne’e mak ita rekolla [reseita hodi] kontribui ba kofre Estadu. Tipu rekolla ne’e tanba kontratu ne’e iha diferensa, balun $5 no balun $10, tanba kontratu ne’e bazeia ba kondisaun uma no rai nia luan no uza ba saida, ba serbisu, rezidénsia ka negósiu, maibé iha Oé-Cusse barak liu mak ba rezidénsia ka hela fatin”, nia dehan.
Notísia relevante: DNTP Oé-Cusse rekolla reseita $10.535 husi arrendamentu rai no uma Estadu
Nia esplika katak tuir kontratu arrendamentu, se arrendatóriu selebra ona kontratu ho Estadu, bainhira la kumpre kontratu ka tarde halo pagamentu bele fó sansaun ka hapara kontratu no bele fó 50% husi valór kontratu mensál nian.
Kontratu arrendamentu sira-ne’ebé uza uma no rai Estadu bazeia ba lei númeru 01/2003, loron 10 fulan-Maiu, no nia implementasaun utiliza dekretu-lei númeru 19/2004, loron 29 fulan-Dezembru.
Jornalista: Abílio Elo Nini
Editora: Maria Auxiliadora
