iklan

KOVALIMA, HEADLINE

Manorin na’in-110 iha Covalima tama iha lista reforma obrigatória

Manorin na’in-110 iha Covalima tama iha lista reforma obrigatória

COVALIMA, 07 Janeiru 2025 (TATOLI) – Servisu Munisipál Edukasaun Covalima (SMEC) rejista manorin hamutuk na’in-110 mak tama ona iha lista reforma obrigatória.

Diretora Servisu Munisipál Edukasaun Covalima, Elda de Fátima, dehan husi númeru profesór 110 ne’e, na’in-10 mak submete ona pedidu reforma ba SEMC, maibé balun lakohi aprezenta.

“Manorin ne’ebé tama ona lista reforma obrigatória balun hakarak kontinua hanorin alunu sira, nune’e nafatin hamosu problema tanba sira hanorin la ativu no fó impaktu ba prosesu aprendizajen”, Elda de Fátima afirma iha Santa Rosa, ohin.

Dirijente ne’e dehan profesór sira ne’ebé tama iha lista reforma ne’e maioria husi Eskola Bázika Sentrál 24 ho nia filiál 94 ne’ebé eziste iha postu administrativu Fatululik, Fatumea, Fohorem, Tilomar, Maucatar, Suai no Zumalai.

Tuir dadus, totál profesór husi Eskola Pré-eskolár (EPE), Ensinu Báziku Sentrál (EBC), Ensinu Sekundáriu (ES) no Ensinu Tékniku Vokasionál (TECVOK) ne’ebé hanorin iha Covalima hamutuk 982, husi númeru ne’e mane 589 no feto 393.

Iha sorin seluk, Koordenadór Eskola Bázika Filiál (EBF) 1,2 Wematan, Danilo Amaral, informa daudaun ne’e Eskola Bázika Filiál 1,2 Wematan iha manorin 14, husi númeru ne’e profesór na’in-lima mak tama iha lista reforma obrigatória.

“Manorin na’in-lima ne’ebé tama iha lista reforma obrigatória ho idade 65, nune’e eskola hasoru difikuldade menus manorin, tan ne’e presiza atu koloka tan profesór hodi troka sira ne’ebé tama iha lista reforma. Se halo kolokasaun tarde, aula barak sei abandona”, nia rekomenda.

Tuir dadus, alunu husi EBC Wematan husi primeiru to’o sesta anu hamutuk 400-resin ne’ebé okupa saladeaula 12.

Lembra katak, iha 2024, Ministériu Edukasaun koloka ona profesór ne’ebé liu bolsa kandidatura hamutuk 29 ba eskola sira ne’ebé falta manorin. Husi númeru ne’e, faze dahuluk destaka na’in-13 no daruak koloka na’in-16.

Notísia relevante: Funsionáriu na’in-12 iha Covalima tama iha lista reforma obrigatória

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!