DILI, 07 janeiru 2025 (TATOLI)– Sekretáriu Estadu Arte no Kultura (SEAK), Jorge Soares Cristóvão, ne’ebé mós hala’o kna’ar nu’udar Koordenadór Jerál ba Jogu Komunidade Ko’alia Lian Portugés (CPLP-sigla portugés), realiza enkontru xave ida hodi avansa preparasaun ba jogu CPLP.
Enkontru ne’e ho objetivu atu finaliza ezbosu kompriensivu ida kona-ba dokumentu hotu-hotu ne’ebé presiza, inklui planu orsamentu, hodi sai hanesan roteiru ba eventu ne’e. Ezbosu ne’e sei aprezenta durante diskusaun sira iha futuru ho liña ministeriál relevante sira ne’ebé responsavel ba organizasaun jogu sira.
Notisia relevante:KM aprova rezolusaun hodi kria komisaun eventuál interministeriál ba jogu CPLP iha 2025
Enkontru ne’ebé hala’o iha Salaun MJDAK, Lecidere Dili ne’e, halibur Diretór Jerál Desportu, João M. Rodrigues, Diretór Jerál Juventude, David Tomás de Deus, no mós Diretór Nasionál sira, Xefe Gabinete MJDAK, Egas Barros Guterres Godinho, no asesór tékniku sira.
Iha diskursu, SEAK hateten, importánsia husi esforsu koordenadu ho di’ak iha preparasaun ba Jogu CPLP, ne’ebé sei hala’o iha fulan-Jullu mai ne’e.
“Ami-nia objetivu ohin maka atu asegura preparasaun kle’an ba Jogu CPLP. Ida-ne’e maka momentu orgullu ida ba ami, tanba ami antisipa atu simu partisipante sira to’o 700-resin, la inklui delegasaun ministeriál sira. Ami-nia komisaun téknika serbisu maka’as hodi kria esbosu sólidu no planu orsamentu ne’ebé sei orienta ami hodi aprezenta proposta forte durante enkontru sira ne’ebé sei mai ho parte interesada ministeriál sira,” dehan SEAK.
Nune’e, Nia husu ba Diretór Jerál sira, Diretór Nasionál sira, no Xefe Departamentu sira atu kolabora besik ho ekipa tékniku hodi asegura ezekusaun jogu sira ne’e ho susesu.
Tanba, Jogu CPLP hanesan oportunidade ba Timor-Leste atu hatudu nia abilidade atu sai uma-na’in ba eventu desportivu internasionál sira no atu eleva liután nasaun nia reputasaun iha palku globál.
Jogu CPLP tinan ida ne’e sei hetan partisipasaun másimu hosi Estadu-membru sira, ho delegasaun hanesan, Angola (partisipante 101), Brazil (101), Cabo Verde (101), Guiné-Bissau (61), Guiné Ekuatoriál (35), Mosambike ( 70), Portugál (101), São Tomé e Prínsipe (35), no Timor-Leste (101).
Eventu importante ida-ne’e hatudu Timor-Leste nia kompromisu atu haburas interkámbiu kulturál no atlétiku iha komunidade CPLP nia laran.
Notisia relevante:Nasaun membru kompromete apoia TL hodi susesu sai uma-na’in ba Jogu CPLP 2025
Jornalista: Hortencio Sanchez
Editór : Florencio Miranda Ximenes