OÉ-CUSSE, 08 Janeiru 2025 (TATOLI) – Ekipa Zona Ekonómika Espesiál Dezenvolvimentu Oé-Cusse Ambeno (ZEEDOA) kuda bambuu rihun 4 iha Rejiaun Administrativa Espesiál Oé-Cusse Ambeno (RAEOA), nune’e prepara ba futuru estabelesimentu fábrika bambuu nian iha rai-ketan ne’e.
Koordenadór ZEEDOA, João Mendes Gonçalves, dehan bambuu ne’e nia materiál prima barak iha Timor-Leste no identifika katak plantasaun ne’e eziste iha Oé-Cusse.
“Maibé ita labele konta de’it buat ne’ebé iha tiha ona, ita tenke aumenta tan produsaun bambuu, tanba materiál prima ne’e tenke iha beibeik, tanba ita kuandu halo ona indústria iha rai-laran sei presiza barak, entaun tenke prepara viveiru, tenke kuda barak”, João Gonçalves dehan iha Oé-Cusse, ohin.
Tuir nia, polítika ZEEDOA iha futuru hakarak promove produtu bambuu iha rai-laran hodi fornese mobiliáriu bá eskola no fatin públiku sira seluk. Aleinde ne’e, bambuu kontribui ba hametin rai no reforsa débitu bee-matan sira.
Notísia relevante: ZEEDOA prioriza ba transformasaun Oé-Cusse sai destinu prinsipál ba turizmu
“Tanba ha’u-nia planu iha futuru ami sei harii mós fabrika bambuu ida iha Oé-Cusse hodi transforma bambu ne’e ba produtu finál sira mak hanesan meza, kadeira, kama, armáriu, kortiña no nesesidade seluk tan. Maibé, bambuu la’ós de’it utiliza ba indústria ekonómia maibé fó mós benefísiu seluk, bele prevene erozaun ka rai-halai, inklui konserva bee-barak”, dehan.
Diretór Peskiza no Formasaun Servisu Komunitáriu Institutu Bambuu Tíbar, Saturnino dos Santos, agradese tanba liuhusi kooperasaun ho ZEEDOA bele espande plantasaun bambuu, nune’e iha futuru bele etabelese fábrika iha Oé-Cusse.
“Iha pedidu primeiru, ZEEDOA husu apoia viveiru 4000 atu kuda iha faze dahuluk ne’e, maibé ami apoia uluk 2000, tanba programa ne’e ZEEDOA estabelese ona grupu haat iha sub-rejiaun sira, entaun iha tempu badak sei kompleta tan”, nia dehan.
Notísia relevante: ZEEDOA aprezenta relatóriu ba Primeiru-Ministru
Xefe grupu bambuu iha suku Costa, sub-rejiaun Pante Makasar, Albino Bobo, agradese tanba grupu ho ema na’in-25 durante ne’e hetan apoiu husi Institutu Bambu Tíbar hodi hanorin kona-ba tékniku kuda bambuu, tanba la fásil atu bambuu.
Jornalista: Abílio Elo Nini
Editora: Maria Auxiliadora
