iklan

HEADLINE, OEKUSI

Partisipante korrida cavalo Oé-Cusse lamenta tanba seidauk simu prémiu

Partisipante korrida cavalo Oé-Cusse lamenta tanba seidauk simu prémiu

eprezentante kuda-na’in, Jeremias Caba (loos). Foto/Abílio Elo Nini

OÉ-CUSSE, 09 Janeiru 2025 (TATOLI) – Partisipante sira iha kompetisaun korrida cavalo, ne’ebé realiza iha suku Cunha, Rejiaun Administrativa Espesiál Oé-Cusse Ambeno (RAEOA), lamenta tanba seidauk hetan prémiu husi komisaun organizadora.

Tanba ne’e, kuda-na’in 12 hakbesik bá iha Gabinete Prezidente Autoridade RAEOA, Rogério Lobato, hodi husu tuir tanba balun simu ona prémiu, maibé seluk seidauk.

“Ami-nia kuda sira halai taru iha loron 14 Dezembru no finál iha 18 Dezembru 2024, maibé prémiu ami seidauk simu. Ami tama to’o finál ne’e iha kuda 24, maibé kuda 12 husi kuartu to’o sestu lugar simu ona prémiu, hela ami kuda 12 hanesan primeiru to’o terseiru lugar mak seidauk simu”, reprezentante kuda-na’in, Jeremias Caba, lamenta iha Oé-Cusse, ohin.

Notísia relevante: Kuda 92 husi NTT no Timor-Leste kompete malu iha Oé-Cusse

Nia relembra katak iha abertura eventu ne’e, Prezidente Komisaun Organizadora fó-sai katak prémiu ba primeriu lugar $1.700, segundu $1.500 no terseiru $1.200, maibé iha ámbitu fahe prémiu fó de’it ba kuartu to’o sestu lugar.

“Foin daudaun komisaun organizadora foti ona ami-nia númeru telefone dehan depois mak kontaktu atu mai simu prémiu, maibé to’o agora ami laiha informasaun ruma. Tan ne’e mak ami mai husu tuir atu fó ka la’e”, nia dehan.

Kuda-na’in sira promete bainhira autoridade RAEOA no komisaun organizadora la entrega prémiu, sira sei husu ba Prezidente Repúblika, José Ramos Horta, atu konsidera. “Tanba iha kompetisaun ne’e envolve maluk sira husi NTT no Prezidente Repúblika mak mai halo abertura. Entaun, sei husu Prezidente Repúblika no husu apoia mós ba CAC atu mai halo investigasaun”, nia afirma.

Notísia relevante: Pordasi NTT prepara kuda 40 hodi partisipa iha kompetisaun korrida cavalo

Vise-Prezidente sssosiasaun Korrida Cavalo Oé-Cusse Ambeno, Batista Leos.
Foto Tatoli/Abílio Elo Nini

Hatán ba asuntu ne’e, Vise-Prezidente Asosiasaun Korrida Cavalo Oé-Cusse Ambeno (ACCOA), Batista Leos, klarifika katak Gabinete Prezidente Autoridade (GPA) RAEOA aprova orsamentu ba kompetisaun ne’e.

Tanba ne’e, kuda-na’in sira husi Nusa Tenggara Timur (NTT) simu ona prémiu no kuda lokál sira ne’ebé sai manán-na’in ba kuartu to’o sestu lugar mós foti ona sira-nia direitu, falta mak primeiru to’o terseiru lugar.

“Tanba orsamentu ne’ebé aprova husi GPA RAEOA kompletu, maibé komisaun organizadora husi Road Race Fraternidade mak empresta tiha osan corrida cavalo nian hamutuk rihun $15 hodi fó prémiu ba kompetitór sira. Entaun, to’o ohin prosesu levantamentu osan husi Road Race nian ne’e GPA seidauk aprova atu troka filafali osan corrida cavalo nian”, nia klarifika.

Nia lembra katak bainhira iha kompetisaun finál korrida cavalo, komisaun organizadora konsege bá koordena ho GPA, maibé orsamentu ba eventu ne’e nian konfirma ho parte finansa no hetan karta despaixu katak osan korrida cavalo ne’e fó fali ba Road Race ne’ebé lidera husi Vise-Koordenadór ZEEDOA, Régio da Cruz Salu, entaun presiza hein, tanba verba ba atividade Road Race tenke hetan aprovasaun mak foin fó prémiu.

FOTO ATUÁL: Abertura kompetisaun kuda halai taru iha Oé-Cusse

Jornalista Tatoli tenta konfirma ho Prezidente Komisaun Organizadora Road Race Fraternidade, Régio da Cruz Salu, maibé laiha fatin tanba daudaun ne’e hala’o hela serbisu iha Dili.

Rekorde katak Prezidente Autoridade RAEOA, antes ne’e, deklara iha abertura eventu korrida cavalo katak autoridade prevee rihun $40-resin ba atividade ne’e.

Jornalista: Abílio Elo Nini

Editora: Maria Auxiliadora

iklan
iklan

Leave a Reply

iklan
error: Content is protected !!