OÉ-CUSSE, 10 Dezembru 2024 (TATOLI) – Pengurus Pusat Persatuan Olahraga Berkuda Seluruh Indonesia (Pordasi) husi provínsia Nusa Tenggara Timur (NTT) lori kuda 40 atu kompete iha eventu korrida cavalo, ne’ebé realiza iha Rejiaun Administrativa Espesiál Oé-Cusse Ambeno (RAEOA).
Sekretáriu Pordasi NTT, Daud Benhur Malelak, informa katak kuda sira-ne’e mai husi NTT, liuliu Kupang, Timor Tengah Utara (TTU), Belu, Timur Tengah Selatan (TTS), Malaka, no husi Rote-Sabu.
“Kuda 40 ne’e barak liu husi distritu Timur Tengah Utara, tanba fronteira direta ho Oé-Cusse. Segundu mak husi Kupang no kabupaten TTS, Belu, inklui pulau Rote. Entaun, ida ne’e indika katak sira iha interese ba halai kuda iha Timor-Leste. Ita hein katak eventu ida ne’e sei kontinua eziste no hamoris valór importante sira”, Daud Malelak dehan ba jornalista sira iha suku Cunha, ohin.
Notísia relevante: Kuda 92 husi NTT no Timor-Leste kompete malu iha Oé-Cusse
Responsavel másimu husi NTT ne’e hateten, antes ne’e, Pordasi hetan konvite ofisiál husi autoridade RAEOA no Asosiasaun Korrida Oé-Cusse Ambeno, ne’ebé hato’o konvite direta ba Governadór NTT, nune’e mak Pordasi simu orientasaun hodi mai partisipa iha kompetisaun ne’e.
“Ami mai iha ne’e tanba kumpre konvite husi autoridade no organizasaun kuda husi Oé-Cusse ho objetivu atu partisipa hodi anima aniversáriu Loron Proklamasaun Independénsia Timor-Leste ba da-49 iha 28 Novembru. Tanba ne’e, ami lori kuda hamutuk 40 mak to’o ona Oé-Cusse”, afirma.
Nia observa katak iha eventu ne’e iha kooperasaun entre komisaun organizadora no komunidade iha Oé-Cusse Ambeno, nune’e la’o iha ambiente seguru.
“Ohin ami mai to’o ne’e sente haksolok tebes hodi partisipa iha eventu ne’e, tanba uluk nanain resepsaun simu ami di’ak, komunidade iha ne’e mós laran-di’ak no entuziasmu simu ami liuhusi fó fatin atu hela no fatin atu hamahon kuda sira. Saida mak ami presiza ba ami-nia kuda sira, maluk sira iha ne’e prontu ajuda hanesan lalin rai-henek no halo uma oan ba kuda sira. Agradese ba Governu tanba koordena ho Governadór no buat hotu la’o di’ak no kapás”, nia hato’o.
Aleinde ne’e, nia dehan populasaun sira iha Oé-Cusse mós hakarak haree kuda halai taru, tanba ne’e hanesan desportu ida ne’ebé presiza atu prezerva no dezenvolve, tanba ida ne’e bei-ala sira hala’o tinan barak ona, entaun labele halakon.
Notísia relevante: Kuda ida mate antes tama iha arena kompetisaun
Foto Tatoli/Abílio Elo Nini
Kona-ba pista korrida cavalo tuir nia observasaun katak sufisiente ona no tuir duni padraun internasionál, maibé presiza hadi’a uitoan.
“Maibé, ami kontente tanba liuhusi atividade sira hanesan ne’e bele hametin liután ita-nia relasaun entre Timor-Leste no Indonézia. Ba ami-nia preparasaun, iha serteza atu manán. Primeiru, ita haree iha klase boot sira, tanba iha Timor-Leste ha’u haree katak ladún iha kuda ne’ebé preparadu barak liu, karik iha tinan hirak tuirmai sei iha kompetisaun bele prepara kuda barak”, nia hatutan.
Iha sorin seluk, Prezidente Asosiasaun Corrida Cavalo Oé-Cusse Ambeno (ACCOA), Mário Muni Salu, afirma katak, daudaun ne’e, komisaun sei kontinua sukat no tetu kuda sira-nia naruk no todan.
“Dadus kuda husi NTT provizóriu iha 27. Agora, balun foin mai, ne’ebé sei rejista no tetu depois ita hatene nia númeru loloos, maibé dadus antes ne’e iha kuda husi Rote haat, husi Kupang kuda haat, Timor Tengah Utara 19”, nia relata.
Notísia relevante: Kompetisaun corrida cavalo iha Oé-Cusse hametin relasaun ho Indonézia
Kompetisaun kuda halai taru ne’e hala’o durante loron lima, hahú iha loron 09 to’o 13 Dezembru 2024, ne’ebé partisipa husi nasaun viziña Indonésia, espesialmente husi provínsia Nusa Tenggara Timur.
Jornalista: Abílio Elo Nini
Editora: Maria Auxiliadora
