OÉ-CUSSE, 09 Dezembru 2024 (TATOLI) – Kompetisaun corrida cavalo iha Oé-Cusse, ne’ebé partisipa mós husi parte Nusa Tenggara Timur (NTT) Indonézia nu’udar momentu ida atu hametin relasaun amizade entre rai rua nian, inklui ba asuntu rekonsiliasaun.
Kompetisaun kuda halai taru ne’e hala’o iha Rejiaun Administrativa Espesiál Oé-Cusse Ambeno (RAEOA) no envolve kuda hamutuk 92 husi NTT no Timor-Leste.
Tanba ne’e, Prezidente Repúblika, José Ramos Horta, satisfeitu ho kompetisaun ne’e hodi festeza Loron Proklamasaun Independénsia ba da-49 iha 28 Novembru 2024.
“Orgullu no benvindu ba kawan-kawan dari NTT. Foin daudaun ha’u bá féria iha Kupang, Rote no Sumba, simu ha’u di’ak tebes no iha ona kolaborasaun ekonómika entre Timor-Leste no NTT. Ita hakarak halo tan programa oioin, investimentu ekonómiku, buat balun la’o daudaun ona. Timoroan ida halo nia tipu investimentu kadiuk farming iha Ataúro, Tíbar hamutuk ho sira iha NTT ne’ebá no halo ona esportasaun bá Singapura. Sira hein iha tempu badak bele hetan mós lisensa atu halo esportasaun bá Xina. Pur tantu, kooperasaun ekonómika la’o daudaun tinan ida ka tinan rua tan bele maka’as liu”, Xefe Estadu dehan iha abertura kompetisaun corrida cavalo iha suku Cunha, ohin.
Notísia relevante: Prezidente Repúblika inaugura pista corrida cavalo iha Pante Makasar
Iha fatin hanesan, Prezidente Autoridade RAEOA, Rogério Lobato, konsidera atividade ne’e atu hametin amizade ho NTT, tanba kuda halai taru ne’e la’ós akontese de’it iha Oé-Cusse, maibé iha NTT mós sai hanesan atividade importante. “Ne’ebé ha’u sente liuhusi atividade ne’e, bainhira ita halai kuda hamutuk, ita bele hametin amizade entre Timor-Leste no Indonézia”, nia afirma.
Tuir nia, Prezidente Repúblika rasik hamutuk ho Primeiru-Ministru mak inisia polítika rekonsiliasaun entre Timor-Leste no Indonézia, ne’ebé sai realidade no halo mundu tomak admira.
“Ne’e duni ami hatutan de’it buat sira-ne’ebé Prezidente Repúblika ho Primeiru-Ministru husik hela. Ita atu hametin di’ak liután relasaun amizade entre Timor-Leste no Indonézia”, nia salienta.
Notísia relevante: Kuda 92 husi NTT no Timor-Leste kompete malu iha Oé-Cusse
Tuir dadus provizóriu, kuda husi provínsia NTT iha 27 no balun sei kontinua mai tan iha aban. Kuda 27 ne’e mai husi Rote haat, Kupang haat no Timor Tengah Utara (TTU) 19.
Jornalista: Abílio Elo Nini
Editora: Maria Auxiliadora
