OÉ-CUSSE, 09 Dezembru 2024 (TATOLI) – Prezidente Repúblika, José Ramos Horta, inaugural, ohin, pista corrida cavalo iha aldeia Noeninen, suku Cunha, sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA).
“Ha’u hakarak fó parabéns ba Prezidente Autoridade RAEOA ho João Gonçalves, ba imi na’in-rua ne’ebé hetan pose foin tinan ida liubá, maibé halo ona programa iha Oé-Cusse ne’ebé fó esperansa ba povu Oé-Cusse”, Ramos Horta dehan iha ámbitu inaugurasaun ne’e.
Xefe Estadu ne’e mós orgullu ho autoridade RAEOA tanba halo kooperasaun di’ak ekipa ho Zona Ekonómika Espesiál no Dezenvolvimentu Oé-Cusse Ambeno (ZEEDOA) hodi konsege dada investidór barak husi nasaun viziña sira atu haree direta kondisaun rai enklave Oé-Cusse.
“Imi na’in-rua bele dada investidór barak mai iha ne’e atu haree no estuda sasán balun la’o daudaun ona, maske orsamentu agora menus liu fali uluk, to’o hanesan 10%, maibé halo buat barak iha Oé-Cusse. Ha’u sei kontinua mai, kontinua kolabora ho sira na’in-rua atu halo Oé-Cusse bele haksoit duni ba oin”, Xefe Estadu dehan.
Iha fatin hanesan, Prezidente Autoridade RAEOA, Rogério Tiago Lobato, hateten Oé-Cusse daudaun ne’e iha ona fatin ida permanente ba kuda halai taru maske seidauk di’ak no sufisiente, maibé autoridade hamutuk ZEEDOA sei esforsa atu halo fatin ne’e sai di’ak iha futuru.
Nia realsa katak ideia hirak-ne’e ho partisipasaun importante mai husi Koordenadór ZEEDOA, João Gonçalves, tanba iha fulan hirak-ne’e nia laran sempre halo diskusaun oinsá harii fatin ida permanente ba kuda sira atu halo kompetisaun.
Notísia relevante: Abitante Umenoah rejeita autoridade RAEOA harii kampu korrida cavalo
“Ne’e duni ami komesa hakat pasu ida ki’ik, tanba bainhira ita atu la’o dook, ita tenke hakat ho pasu ki’ik ida. Pasu k’ik ida mak fatin ne’e, ita halo investimentu ida ho valór rihun $270, ita hili empreza ida nia skill ho kualidade aas tanba fasilidade kompletu atu hala’o projetu ne’e, ne’ebé dirije husi empreza Timor Lorosa’e Unipesoál Lda”, nia dehan.
Prezidente Asosiasaun Corrida Cavalo Oé-Cusse Ambeno (ACCOA), Mário Muni Salu, agradese ba Prezidente Autoridade RAEOA no estrutura, hamutuk ho koordenadór ZEEDOA, tanba iha vontade harii pista korrida permanente iha Oé-Cusse.
“Ami sente ksolok tebes bainhira kompetisaun corrida cavalo dezde tempu portugés, Oé-Cusse nunka iha fatin permanente, maibé to’o autoridade ida-ne’e diriije husi Rogério Lobato marka istória ida katak harii kampu corrida hanesan harii kampu kultura kompetisaun corrida iha Oé-Cusse”, afirma.
Iha biban ne’e nia agradese mós ba komunidade suku Cunha no Lalisuk, tanba bele oferese rai iha mota-ninin iha aldeia Noeninen, hanesan rai patrimóniu públiku ba Estadu nian atu uza ba kompetisaun corrida cavalo iha Oé-Cusse.
Pista ba kuda halai taru ne’e ho nia medida metru 1.200, ne’ebé obra ne’e ezekuta husi empreza Timor-Lorosa’e ho valór kontratu rihun $270.
Notísia relevante: Kuda 92 husi NTT no Timor-Leste kompete malu iha Oé-Cusse
Jornalista: Abílio Elo Nini
Editora: Maria Auxiliadora
