DILI, 13 janeiru 2025 (TATOLI)—Membru Parlamentu Nasionál (PN), Cedelízia Faria dos Santos, apresia komunidade iha Fomentu II koopera ho Governu durante iha prosesu despeju administrativu hodi sai husi fatin risku dezastre naturál iha mota ninin.
Notísia Relevante: Komunidade Fomentu I Comoro koopera ho Governu sobu rasik sira-nia uma
“Ha’u apresia tebes ho komunidade agora, tanba horisehik liuhusi ne’eba, entre ponte CPLP no ponte Comoro III, komunidade komesa sobu sira-nia uma rasik. Sira hasai sasán no komesa sobu zinku, sira komesa koopera ho Governu. Ida-ne’e, ita apresia ita-nia komunidade iha ne’eba tanba sira konsidera buat ne’e ameasa ba sira-nia vida, ne’ebé hotu-hotu ba tiha ona munisípiu,” Nia hato’o liuhusi reuniaun plenária PN, segunda ne’e.
Nune’e, husu kontinua fó fiar ba Primeriu-Ministru, Kay Rala Xanana Gusmão, tanba ema hotu akompaña tinan barak ona nia imposível atu estraga fali nia povu sira no saida mak nia halo di’ak ne’e ba povu nia di’ak.
Deputada KHUNTO, Olinda Guterres, fó apoiu nafatin ba Sekretária Estadu Asuntu Toponímia no Organizasaun Urbana (SEATOU) hasai komunidade iha fatin risku, tanba antes ne’e halo ona notifikasaun no indemnizasaun.
Deputadu PD, António da Conceição “Kaloha”, bolu atensaun ba Governu atu haree mós iha zona Faról, besik ba Igreja Motael, iha jardin 05 de Maiu nia sorin, iha populasaun lubun ne’ebé okupa hela uma tempu portugés nian, okupasaun fatin ne’e estrada imajen sidade nian tanba sira balun haris iha estrada ninin, fase hena no habai hela loos iha jardin laran, hodi estraga panorama jardin nian no mós perturba pasajeiru no viajante ne’ebé liu iha área ne’eba.
Nia dehan, fatin ne’e besik loos ba portu Dili ne’ebé turista sira tun husi ró, dahuluk sira haree kona-ba Timor-Leste mak komunidade ne’ebé okupa no hela iha ne’eba ne’e.
Nune’e mós, nia dehan, iha Bebonuk hahú husi fatin ne’ebé Governu halo lansamentu projetu fibra ótika, iha ne’eba mós populasaun sira halo uma iha estrada sorin no balun halo uma besik loos iha tasi-ibun no balun harii haris fatin besik tasi ibun, populasaun sira rezidente iha ne’eba ameasadu bainhira tasi boot no mós sira hamosu daudaun problema ambientál iha área refere.
“Ita rona mós Governu sei halo luabn estrada husi Kuluhun ba to’o Becora terminál. Ita ladauk rona Governu se iha planu atu hasai okupante sira-ne’ebé hela iha mota ibun Aitarak Laran besik Palásiu Prezidente, tanba ne’e mós espasu públiku no besik edifísiu importante ita-nia nasaun nian,” nia hateten.
Deputada PLP, Maria Angelina Sarmento, kontinua preokupa despeju administrativu ne’ebé hala’o ba komunidade iha Fomentu II Comoro, ema hotu apoiu inisiativa Governu ne’e maibé antes hasai komunidade presiza kria kondisaun ba sira.
Deputada CNRT, Maria Gorumali Barreto, rekomenda husu ba Ministériu Administrasaun Estatál (MAE) atu fó orientasaun ba líder komunitária sira atu kontrola komunidade labele harii uma iha fatin risku ba dezatre naturál hanesan mota ninin, foho lolon no tasi-ibun.
Notísia Relevante: SEATOU-MOP informa prosesu indemnizasaun ba komunidade Fomentu II
Jornalista : Nelson de Sousa
Editór : Cancio Ximenes