DILI, 10 janeiru 2025 (TATOLI)–Komunidade aldeia Fomentu I, suku Comoro, postu administrative Dom Aleixo, munisípiu Dili, ne’ebé durante ne’e konstrui uma iha área afetadu dezastre naturál, koopera ho Governu Konstitusionál da-sia (IX) hodi sobu rasik sira-nia uma antes ekipa konjunta SEATOU halo asaun.
Notísia Relevante: SEATOU muda sai populasaun iha Fomento II Comoro
Xefe suku Comoro, Eligio José da Silva Marçal, hateten populasaun hakarak sobu uluk sira-nia sasán balun atu labele atrapalla, bainhira ekipa konjunta Sejretaria Estadu Asuntu Toponímia no Organizasaun Urbana (SEATOU) ba ho ekipamentu hodi hamamuk fatin.
“Populasaun ne’ebé identifikadu iha tinan kotuk husi ekipa konjunta SEATOU nian hodi foti dadus ba medida uma sira-ne’ebé atu hamamuk. “Família sira-ne’e uma kain hamutuk 92 mak hela iha ne’e, hotu-hotu hetan ona identifikasaun,” Autoridade lokál ne’e hateten ba Agência TATOLI uha Fomentu I, sesta ne’e.

Tuir planu, nia dehan, Governu liuhusi ekipa konjunta husi Sekretária Estadu Asuntu Toponímia no Organizasaun Urbana (SEATOU) sei sei lori ekipamentu pezadu iha segunda (13 janeiru 2024) hodi sobu no tula sai populasaun nia sasán ba fatin foun sira-ne’ebé sira hela k aba sira-nia munsípiu.
Tiuir jornalista TATOLI nia observasaun iha terrenu hatudu katak, populasaun iha aldeia Fomentu I, suku Comoro, hahú hamamuk fatin no sira ida-idak sobu rasik sira-nia hela fatin hodi bele sees aan husi dezastre naturál.
Iha fatin hanesan, organizasaun balun iha sentimentu umanu no solidariedade ne’ebé aas, hahú fahe nesidade bazika ba populasaun sira-ne’ebé sobu sira-nia hela fatin no atu husik hela fatin refere.
Jornalista : Jesuína Xavier
Editór : Cancio Ximenes