iklan

POLÍTIKA

PN husu Governu tau atensaun ba labarik faan sasán iha dalan ninin

PN husu Governu tau atensaun ba labarik faan sasán iha dalan ninin

Atividade labarik sira faan manu-tolun daan iha estrada ninin. Imajen TATOLI/Antonio Daciparu..

DILI, 13 janeiru 2025 (TATOLI)—Deputada CNRT iha Parlamentu Nasionál (PN), Cedelízia Faria dos Santos, kontinua husu Governu liuliu Ministériu Solidariedade Sosiál no Inkluzasaun (MSSI) atu tau atensaun ba labarik faan sasán iha dalan ninin.

Notísia Relevante: PN aprova projetu-lei protesaun ba labarik iha finál globál

“Ha’u preokupa ho preokupasaun sira-ne’ebé maioria Deputadu sira foti iha plenária ida-ne’e, kona-ba ita-nia oan, labarik sira-ne’ebé faan sasán iha estrada ninin. Ha’u haree iha Timor Plaza nia oin ne’e, labarik sira-ne’ebé faan sasán komesa aumenta liután,” Nia levanta liuhusi reuniaun plenária PN, segunda ne’e.

Aleinde ne’e, nia observa iha fatin estabelesimentu komersiál sira seluk iha kapitál Dili, númeru labarik sira faan sasán barak liután.

“Durante tempu natál no tinan foun, ita haree labarik sira barak mak faan ahí oan ne’ebé lakan iha estrada,” nia dehan.

Tanba ne’e, husu ba Governu Konstitusionál da-sia (IX) atu haree dimíniu ka halakon ona envolvimentu labarik iha atividade faan sasán iha fatin no estrada públiku sira iha kapitál Dili.

Husu ba liña ministeriál no liuliu husu ba Ministériu Solidariedade Sosiál no Inkluzaun (MSSI) mak tenke foti responsabilidade ba asuntu labarik faan sasán iha espasu públiku ka dalan ninim sira-ne’e.

“Tanba, ita tau tiha INDICA iha ne’eba, maibé la hatene sira-nia serbisu halos aida. Karik, instituisaun independente harii tiha la halo ninia serbisu, ita bele fó fali ba ministériu seluk toma responbilidade, tanba ne’e ameasa ba ita-nia oan sira nia future,” nia hateten.

Vise-Ministru ba Asuntu Parlamentár, Adérito Hugo da Costa, rejista preokupasaun ne’e no sei hato’o ba ministériu relevante sira atu tau atensaun.

Notísia Relevante: Jerente INDDICA rekoñese la’ós fasil rezolve imediata labarik fa’an sasán iha dalan

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!