UNDIL no IPB hasa’e kualidade liuhusi investimentu rekursu umanu iha rai-li’ur
DILI, 13 janeiru 2025 (TATOLI)–Universidade Dili (UNDIL) no Institutu Politékniku Betano (IPB) kontinua hasa’e kualidade edukasaun liuhusi investimentu rekursu umanu iha rai-li’ur.
“Dosente UNDIL ne’ebé daudaun ne’e kontinua estudu iha rai-li’ur hamutuk na’in-ualu, ne’ebé hetan bolsa estudu husi FDCH. Doutoramentu rua no mestradu iha Coimbra Portugal. Sira-ne’e balun ba área tékniku, ekonomia no saúde,” Vise-Reitór Asuntu Administrasaun Jerál, Rekursu Umanu, Materiál Finansa UNDIL, Tomas Augusto Correia, hateten iha ninia knaar fatin, Mascarinhas, segunda ne’e.
Notísia relevante : UNDIL propoin estudante 1.500 ba tinan letivu 2025
UNDIL kontinua haruka dosente sira hala’o estudu iha rai-li’ur atu melhora liután sira-nia kapasidade no esperiénsia, atu nune’e bainhira fila mai bele kontinua hanorin estudante sira iha universidade ho kualidade.
“Ita hakarak edukasaun iha kualidade, liu-liu iha ensinu superiór sira, entaun primeiru ita tenke investe uluk iha rekursu umanu, nune’e sira bele hanorin estudante sira ho kualidade ne’ebé mak di’ak. Tanba ne’e mak ita kontinua haruka ita-nia dosente sira ba estuda iha rai-li’ur,” nia akresenta.
Iha sorin seluk, Prezidente IPB, Acácio Cardoso Amaral, hateten, daudaun ne’e dosente iha IPB hamutuk na’in-neen mak kontinua sira-nia estudu iha rai-li’ur iha nível doutoramentu.
“Daudaun ne’e profesór na’in-neen mak kontinua nível doutoramentu iha rai-li’ur, iha Japaun ida, Portugal haat, no Brazíl ida ba área konstrusaun sivíl na’in-tolu no produsaun animál tolu,” nia tenik.
Jornalista : Osória Marques
Editora : Julia Chatarina
