DILI, 14 Janeiru 2025 (TATOLI) – Sekretáriu Estadu Komunikasaun Sosiál, Expedito Dias Ximenes, hateten daudaun ne’e mídia sira mai ho plataforma dijitál atu hafásil ema hotu asesu liuhusi online no ida ne’e iha tendénsia ba jornál sira, maibé mídia konvensionál sai nafatin konfirmasaun ikus ba informasaun sira.
Expedito Dias Ximenes hato’o deklarasaun ne’e bainhira hala’o vizita bá redasaun Dili Post no Timor Post hodi haree no hatene liután dezenvolvimentu mídia privada ne’e, liuliu jornál sira ne’ebé hetan apoiu husi Governu ba iha programa distribuisaun jornál ba iha munisípiu, postu administrativu no suku sira.
“Ita hotu hatene, agora, plataforma dijitál ema hotu akompaña informasaun liuhusi online hanesan facebook, live streaming, TV dijitál, tiktok no seluk tan, maibé ba ha’u jornál ka mídia konvensionál sai nafatin konfirmasaun ba informasaun ikus”, governante ne’e dehan iha salaun Timor Post, ohin.
Nia dehan maske mídia dijitál iha tendénsia ba mídia konvensionál, maibé jornál fornese nafatin informasaun ne’ebé arkiva hela no iha tempu ne’ebé de’it mak presiza atu lee, nia iha nafatin no ida-ne’e mak pontu pozitivu husi ezisténsia jornál ne’e sei forte nafatin.
Tuir nia, mídia konvensionál sira tenke aposta liubá kualidade iha divulgasaun ba informasaun ne’ebé hato’o ba públiku, tanba Governu apoia nafatin mídia sira.
“Ha’u-nia eperansa ba mídia imprime sira mak nafatin halo notísia ho forma ne’ebé kualidade no investigativu, nune’e konvida nafatin ema atu lee no labele fó dúvida ba públiku, tanba Governu apoia nafatin mídia sira. Governu fó apoiu la signifika atu halo intervensaun polítika editoriál nian, maibé ita hakarak kualidade”, nia esplika.
Ezekutivu tulun mídia hotu liuhusi programa oioin hanesan distribuisaun jornál ba munisípiu sira, programa Governu Rona, Haree Rasik no meet the press.
Programa Governu atuál nian liuhusi SEKOMS iha 2025 mak kontinua apoia mídia sira, entretantu iha tinan ne’e iha redusaun ba orsamentu kompara ho 2024, maibé atividade ne’e la’o nafatin.
Iha fatin hanesan, Diretór-Ezekutivu Timor Post, Jacob Ximenes, hateten vizita Sekretáriua Estadu Komunikasaun Sosiál ba Timor Post ne’e importante, tanba iha kolaborasaun serbisu mídia nian.
Notísia relevante: SEKOMS asina akordu ho mídia imprime lima distribui jornál ba munusípiu
“Liafuan ne’ebé ami rona husi SEKOMS mak orsamentu atu apoia ba mídia konvensionál sira sei tun uitoan, maibé ne’e la’ós obstákulu ba ami. Importante mak ita serbisu hamutuk tanba ami-nia prioridade mak kualidade notísia no kualidade jornál”, nia dehan.
Iha tempu dijitál ne’e ema hotu bele asesu liuhusi plataforma online no ida ne’e sai obstákulu, maibé mídia konvensionál ka imprime mak bele oriente joven no ema bele asesu nafatin iha mídia imprime.
“Komparasaun mídia sosiál no konvensionál diferente tebes, tanba iha mídia sosiál buat di’ak ka aat bele asesu hotu, maibé iha konvensionál ne’e la’e, ta’is didi’ak mak hatún informasaun. Daudaun ne’e ami-nia parte kontinua distribui jornál bá munisípiu, postu adminustrativu, inklui suku sira ne’ebé besik iha kapitál munisípiu ka postu administrativu sira”, Jacob Ximenes hateten.
Lembra katak Sekretaria Estadu Komunikasaun Sosiál selebra, iha 2024, kontratu ho órgaun komunikasaun sosiál hamutuk 14 hodi divulga informasaun ba munisípiu to’o suku sira, liuhusi distribuisaun jornál no programa sira ne’ebé publika iha plataforma mídia online.
Akordu ne’e ho nia durasaunn ba fulan 11 ne’ebé realiza iha fevereiru ba mídia privada mak hanesan Dili Post, GMN, Gardamor TV, Jornal Independente, Hatutan.Com, Lafaek News, Media Mudansa, Media One Timor, Suara Timor Lorosa’e, Timor Post, TVET, VIP-TV, LABEH TV no SMNews ne’e. Totál orsamentu ne’ebé SEKOMS prevee ba selebrasaun kontratu ho órgaun 14 ne’e ho montante rihun $200.
Notísia relevante: Órgaun komunikasaun 14 sei divulga informasaun ba munisípiu to’o suku sira
Jornalista: Arminda Fonseca
Editora: Maria Auxiliadora
