DILI, 16 Janeiru 2025 (TATOLI) – Institutu Kualidade Timor-Leste (IQTL, sigla portugés) finaliza ona instalasaun ba ekipamentu kalibrasaun nian iha laboratóriu nasionál IQTL.
Ekipamentu sira ne’e hetan apoiu husi Organizasaun Nasaun Unida ba Dezenvolvimentu Industriál (UNIDO) no to’o Timor-Leste iha tinan kotuk.
“Ita-nia tékniku hamutuk na’in-hitu ne’ebé sei hetan treinamentu ikus iha loron 24 Janeiru 2025, ne’ebé fasilita husi UNIDO no parseiru internasionál sira seluk, tanba tékniku sira preparadu atu hala’o serbisu iha laboartóriu”, Prezidente IQTL, Izilda Manuela Soares, hateten iha Pavillaun II, Sentru Konvensaun Dili, ohin.
Nia espera katak ho ekipamentu kalibrasaun ne’ebé estabelese ona bele ajuda empreza sira ne’ebé hakarak halo teste kalibrasaun nian.
“Iha 24 Janeiru 2024, tékniku sira husi IQTL hamutuk na’in-hitu hetan treinamentu ikus husi UNIDO no parseiru internasionál sira seluk. Agora, ita-nia tékniku sira iha ona esperiénsia no preparadu atu hala’o serbisu iha laboartóriu”, nia dehan.
Orsamentu ne’ebé prevee halo reabilitasaun faze dahuluk ba laboratóriu nasionál iha 2023 hamutuk rihun $89 no reabilitasaun faze daruak iha 2024 hamutuk rihun $84.
Notisia relevante: Ekipamentu kalibrasaun ba estabelesimentu laboratóriu nasionál IQTL to’o ona Timor
Jornalista: Arminda Fonseca
Editora: Maria Auxiliadora