DILI, 16 janeiru 2025 (TATOLI)–Komisaun A ne’ebé trata asuntu Justisa no Konstituisionál iha Parlamentu Nasionál (PN) sei fó prioridade diskusaun ba lei reforma justisa, lei sibernétika no inisiativa seluk tan durante iha tinan 2025.
“Prioridade barak loos, ida mós kona-ba lei sibernétika no lei lubun ida, liu-liu kona-ba reforma justisa nian sei mai ne’e prioridade, ita hein hela husi Governu aprezenta mai,” Prezidente Komisaun A, Patrocínio dos Reis Fernandes, informa ba Agência Tatoli, iha resintu PN, kinta ne’e.
Komisaun halo ona komunikasaun ba Governu no hein inisiativa ne’e bele submete ona ba PN hodi bele fó andamentu.
Antes ne’e, Prezidente Parlamentu Nasionál (PPN), Maria Fernanda Lay, akompañadu husi bankada parlamentár no Komisaun A simu audiénsia husi Koordenadora Grupu Traballu Reforma Setór Justisa, Lúcia Lobato, hodi hato’o serbisu sira-ne’ebé hala’o ba órgaun soberania daruak ne’e no ba oin lejizlasaun barak ne’ebé sei hato’o mai PN hodi bele diskute no aprova.
“Ida urjente atu aprova mak lei orden advogadu, tanba ita hatene katak ita-nia advogadu privadu ho nia eskritóriu iha ne’e barak hodi hala’o presta asisténsia ba timoroan sira-ne’ebé presiza apoiu, maibé seidauk iha lei atu regula sira-nia atividade,” Koordenadora tenik.
Notísia relevante : Kaleidoskópiu 2024: PN aprova lei ualu-OJE 2025-rezolusaun 34
PN aprova ona lei ualu durante tinan 2024 nia laran.
- Lei sira ne’e mak hanesan, lei númeru 1/2024, 08 maiu alterasaun daruak lei n.º 8/2009, 15 jullu, kona-ba Komisaun Antí-Korrupsaun.
- Lei nº 2/2024, 8 maiu, Ezersísiu Direitu Petisaun.
- Lei nº 3/2024, 12 juñu, alterasaun datoluk lei nº 3/2006, 12, abríl, Estatutu Kombatente Libertasaun Nasionál.
- Lei nº 4/2024, 03 jullu, Presidénsia no Protokolu Estadu.
- Lei nº 5/2024, 17 jullu, Mandatutu titulár ou membru órgaun designadu husi Parlamentu Nasionál.
- Lei nº 6/2024, 17 jullu, aprova Lei Baze Ensinu Superiór no prosede alterasaun dahuluk lei nº 14/2008, 29 outubru, Lei Baze Edukasaun.
- Lei nº 7/2024, 23 outubru, Autorizasaun lejislativa ba Governu iha matéria fixasaun limite idade ba relasaun traballu funsionáriu públiku no ajente administrasaun públika.
- Lei nº 8/2024, 26 novembru, Orsamentu Jerál Estadu (OJE) 2025.
Aleinde ne’e, aprova mós rezolusaun hamutuk 34.
Jornalista : Nelson de Sousa
Editora : Julia Chatarina