Veteranu Covalima prenxe formuláriu atu protesta no reklama lista editál
COVALIMA , 17 janeiru 2025 (TATOLI) – Veteranu Covalima kontinua organiza malu hodi halo protesta kontestasaun ba desizaun Ministériu Asuntu Kombatente Libertasaun Nasionál (MACL, sigla portugés) nune’e distribui ona formuláriu aseitasaun atu submete karta protesta no reklamasaun lista editál ne’ebe publika ona .
“Ita-nia karta protesta no reklamasaun ita fó tempu ba Ministériu Asuntu Kombatente Libertasaun Nasionál durante loron 30. Bainhira la fó rezultadu, ita mobiliza malu tuun ba Dili hodi ezije atu halo klarifikasaun” Eis-sekretáriu Zona Fronteira, Manuel Barboja Pina “Mameran” hato’o iha edifísiu CCLN Covalima Tabakolot, ohin.
Notísia relevante:Veteranu Covalima identifika erru balun iha publikasaun lista editál naran KLN
Mameran hanesan eis-sekretáriu Zona postu Fronteira bainhira submete karta protesta no reklamasaun fó tempu durante loron 30 la iha rezultadu nia sei mobiliza veteranu ba nasionál no promete atu entrega fali medalla no husu atu kansela nia pensaun ne’ebé mak nia simu kada fulan.
Razaun atu entrega, tanba nia hanesan sekretáriu zona iha responsabilidade atu haree veteranu sira ne’ebé mak luta ba rai ida-ne’e maibé nia naran publika sai iha lista editál kombatente menus a três no barak mak prestasaun pekuniaria únika 3 a 7 no ema ne’ebé la luta nia mak publika sai iha lista editál 8 a 14.
“ Ha’u sei entrega medallau no husu atu kansela ha’u-nia pensaun bainhira ita-boot sira-nia naran la fó sai iha lista editál 8 a 14 tanba ne’e ita-boot sira mai foti formuláriu hodi prense nune’e ita bele submete karta proposta no reklamasaun ba Ministériu,” nia dehan.
Veteranu sei prepara transporte no ai-han rasik tuun ba Dili nune’e hodi husu ministériu bele responde tanba ho rezultadu ne’ebé publika sai hatun dignidade husi Covalima nune’e presija iha justisa ne’ebé justu ba ema hotu; labele halo konfujaun.
Tuir dadus provizóriu veteranu na’in-300 resin mak asina hodi halo protesta no halo reklamasaun ba publikasaun lista editál ne’ebé fó sai husi Ministériu Asuntu Kombatente Libertasaun Nasionál iha loron 15 janeiru tinan ne’e.
Nune’e nia husu ba veteranu sira halo asaun, labele halo krime maibé halo de’it asaun protesta no halo reklamasaun ba ema ne’ebe lamerese nia atu sai lista naran 8 a 14, maibé iha lista sira tau iha lista publikasaun 8 a 14.
Iha sorin seluk , Filomena de Jesus Moniz reforsa katak, feto sira mós fó aan hodi luta ba rai ida-ne’e hahú 1975 maibé komisaun n verfikasaun konsidera sira-nia naran tama iha lista menus tinan tolu no 3 a 7
“Mekanizmu avaliasaun ami presiza atu hatene no kritéria oinsá ema sira ne’ebé uluk la luta maibé nia naran sai iha lista editál 8 a 14 maske ami ki´ik maibé lei la valoriza ami tanba uluk funu valoriza ema ki´ik sira maibé agora la valoriza ema ki´ik sira” nia lamenta.
Notísia relevante:Veteranu Covalima halo asaun protestu hodi kontesta aprovasaun lista KLN
Jornalista: Celestina Teles
Editór :Rafael Ximenes de A. Belo
