DILI, 20 janeiru 2025 (TATOLI)–Meza Parlamentu Nasionál (PN) liuhusi reuniaun plenária, segunda ne’e, halo anúnsiu admisaun no baixa proposta-lei númeru 13/VI(2a)-Kódigu Rekuperasaun no Insolvénsia ba Komisaun A ne’ebé trata asuntu Justisa no Konstituisionál no Komisaun D ne’ebé trata asuntu Ekonomia no Dezenvolvimentu, hodi bele halo apresiasaun inisiál.
“Iha ajenda períodu ordem do dia, iha anúnsiu admisaun no baixa ba proposta-lei númeru 13/VI(2a)-Kódigu Rekuperasaun no Insolvénsia, ne’e importante tebes, prazu tau hotu ona iha ne’ebá, husu komisaun atu tau atensaun,” Prezidente Parlamentu Nasionál (PPN), Maria Fernanda Lay, fó sai iha reuniaun iha sala plenária PN.
Kona-ba konteúdu proposta-lei ne’e meza seidauk fó sai detallu tanba komisaun espesializada permanente sei fó uluk apresiasaun inisiál, hafoin sei kontinua ba prosesu tuir mai.
Notísia relevante : Governu aprova projetu Lei Kódigu Rekuperasaun no Insolvénsia
Governu liuhusi reuniaun Konsellu Ministru (KM) iha loron 19 juñu 2024 aprova projetu proposta-lei hodi kria Kódigu Rekuperasaun no Insolvénsia.
Inisiativa ne’e aprezenta husi Vise Primeiru-Ministru, Ministru Koordenadór Asuntu Ekonómiku no Turizmu no Ambiente, Francisco Kalbuady Lay no Governadór Banku Sentrál Timor-Leste (BCTL, sigla portugés), Helder Lopes.
Kriasaun ba kódigu ne’e ho objetivu atu promove investimentu inklui transforma no moderniza ekonomia nasionál.
Jornalista : Nelson de Sousa
Editora : Julia Chatarina
