DÍLI, 22 de Janeiru 2025 (TATOLI) – Timor-Leste rejista, iha Dezembru 2024, inflasaun 0,2% iha Índise Presu ba Konsumidór (IPK), kompara ho fulan anteriór, ne’ebé reporta deflasaun 0,2%, informa dadus husi Institutu Nasionál Estatístika Timor-Leste, Institutu Públiku (INETL, I.P).
Tuir dokumentu INETL, kreximentu ba presu sira ne’e kontribui husi aumentu folin ba produtu hahán no bebida la’ós alkoólika 0,2%. Enkuantu, transporte rejista redusaun 0,3%, hatais no sapatu aprezenta diminuisaun 0,1%.
“Presu hahán no bebida la’ós alkoólika sa’e 0,2%, tanba hetan impaktu husi subgrupu modo-tahan aumenta 1,3%, susubeen, keiju no manutolun sa’e 1,2%, ai-fuan aumenta 0,2%, no masin-midar, marmelada, bani-been, xokolate no hahán midar sa’e 1,3%”, dokumentu ne’e dehan.
Relasiona ho subgrupu foos aprezenta presu tun 0,2%, ikan no hahán tasi tun 0,3%, naan 0,2%) no mina no bokur 0,3%.
Persentajen IPK anuál rejista diminuisaun 0,4% iha fulan-Dezembru 2024 kompara ho períodu omólogu 2023, hetan kontribuisaun husi grupu transporte 2,4%, álkool no tabako 3,2%, ekipamentu no manutensaun mobiliáriu uma laran 1,2%, uma 0,7%, komunikasaun 0,9% no hatais no sapatu 0,3%.
Notícia relevante: IPK grupu hotu tun -0,2% iha novembru 2024
TATOLI
