BOBONARO, 24 janeiru 2025 (TATOLI)—Koordenadór Eskola Esinu Sekundáriu Jerál (ESG) públiku Balibo, Reinaldo das Dores, konsidera imformasaun ne’ebé espala iha públiku dehan estudante ESG Balibo tuur iha rai hodi partisipa prosesu eprendizajen iha saladeaula ne’e Hoax.
Nia rekoñese, ESG Balibo enfrenta duni problema menus karteira eskolár hanesan kadeira no meza, maibé dirijente eskola halo jestaun ba klase hodi fahe ba turnu dadeer no meudía nian.
Notísia Relevante: Edukasaun Bobonaro presiza tán karteira eskolár 165 ba eskola foun
“Ami mós rona imformasaun ne’e hakfodak, tanba fahe tarefa ne’e iha sábadu, depois segunda ne’e deputadu sira kestiona buat ne’e. Maibé, alunu nunka tuur iha rai tanba ami iha estudante 590 husi 10 Ano to’o 12 Ano ne’e, ami fahe ba turnu rua. Ami iha sala 16 no estudante kada na’in-rua tuur hamutuk iha sala ualu (8) turnu dadeer no sala ualu (8) iha turnu meudia. Ne’ebé, alunu la tuur iha rai. Foin lalais ne’e, kadeira menús duni maibé ami koordena ho ensinu Báziku ne’ebé eziste iha postu Balibo, ami husu meza ho kadera ne’ebé la uza entaun mai apoia ami-nia eskola,” nia hateten ba jornalista sira iha Maliana, sesta ne’e.
Jestór eskola ne’e hatete, pedidu kona-bá apoia karteira eskolár parte eskola husi diretór Sentru Eskola Dom Martino da Costa Lopes Maliana hato’o ona ba Servisu Munisipál Edukasaun, Munisípiu Bobonaro.
“Ami-nia sala tolu (3) ida foun ne’e mak kadeira ho meza menús. Ne’ebé, ami hein husi Ministériu haruka mai, ami mós hein katak ministériu loke vaga foun para haruka tan profesór mai,” nia dehan.
Reprezentante estudante ESG públiku Balibo, Helena Sonia Pinto dos Reis, husu Ministériu Edukasaun atu konsidera pedidu ne’ebé dirijente eskola sira submete, tanba saladeaula balun mamuk.
“Ami-nia dezafiu mak kadeira no meza la kompletu, depois ami sei uza meza ne’ebé mak aat. Ami uza la to’o, antes alunu 10 Ano sira mai ne’e ami uza to’o. Komu alunus 10 Ano sira mai ema aumenta tan, entaun la to’o. Uluk, ami sei SMA klase 2 ne’e tuur iha rai de’it, depois hetan ajuda ami hetan kadeira tiha, agora ami mai klase 3 tíha nafatin kadeira menús. Ami na’in-rua tuur hamutuk, balun hamriik de’it, ami tuur iha rai ne’e laiha ida,” nia informa ba jornalista sira, iha eskola Dom Samara Balibo, kinta ne’e.
Reprzentante estudante ESG públiku Balibo, Sonia, sente kontente no agradese tanba Autoridade Munisípiu Bobonaro liuhusi Orsamentu Planu Integradu Dezenvolvimentu Munisipál (PDIM) tinan 2024 konsege konstrui ona sala foun tolu (3).
Observasaun Agência Tatoli iha terrenu, kinta ne’e, nota katak maioria estudante ESG Balibo tuur iha kadera hodi partisipa iha prosesu ensinu no aprendizajen loro-loron.
Enkuantu, tuir dadus tinan letivu 2025 ne’e, totál estudante ne’e akumula iha ESG publiku Balibo hamutuk 590 no profesór na’in-hitu (7).
Notísia Relevante: Edukasaun Bobonaro garante ezame períodu daruak la’o ho di’ak
Jornalista : Sérgio da Cruz
Editór : Cancio Ximenes
