DILI, 24 Janeiru 2025 (TATOLI) – Ministériu Transporte no Komunikasaun (MTK) orienta ona empreza PT. Waskita Karya no Ajénsia Kooperasaun Internasionál Japaun (JICA, sigla inglés) prepara dezeñu Aeroportu Internasionál Prezidente Nicolau Lobato (AIPNL), Comoro, hodi aprezenta ba Primeiru-Ministru (PM), Xanana Gusmão.
Ministru Transporte no Komunikasaun, Miguel Manetelo, lembra katak iha kuarta, 22 Janeiru, Xefe Governu husu dezeñu foun ba konstrusaun aeroportu Dili.
“Daudaun prosesu balun la’o, iha ona dezeñu rua. Ida husi PT. Waskita ba infraestrutura hanesan pista, dezeñu ida kona-ba terminál ne’e husi JICA. Antes ha’u bá rai-li’ur, ami halo ona enkontru ho empreza rua ne’e ko’alia ho sira atu prepara dezeñu. Ha’u husu ba sira antes trimestre dahuluk ne’e ramata tenke aprezenta ona dezeñu mai ministériu haree hodi aprezenta ba primeiru-ministru”, governante ne’e dehan ba jornalista sira, iha Caicoli, ohin.
Notísia relevante: Primeiru-Ministru hein dezeñu foun ba espansaun aeroportu Comoro
Nia hateten públiku hakarak atu hatene kontratu ne’ebé asina husi Governu anteriór iha 29 Maiu 2023 ho modalidade ida bolu design and build, ida-ne’e katak tuir konkursu públiku laiha dezeñu. “Kompañia manán tiha mak foin halo dezeñu no kontinua halo konstrusaun. Entaun, daudaun ne’e prosesu ida ne’e mak la’o”.
Miguel Manetelo haktuir katak bainhira nia simu pose hanesan Ministru Transporte no Komunikasaun, nia bá empreza Waskita Karya no haree katak dezeñu laiha, maibé manán osan millaun $72. Hodi esplika katak modalidade ida design and build ne’e tuir lei mós bele, tanba prosesu ne’e verifika husi Tribunál Konta.
Lembra katak Governu Daualuk selebra ona kontratu, iha Maiu 2023, ho empreza tolu ne’ebé halo dezenvolvimentu ba Aeroportu Internasionál Prezidente Nicolau Lobato, Comoro, mak Waskita Karya, PT. Amythas no ida husi Japaun.
Dezenvolvimentu aeroportu hakarak hahú husi faze konstrusaun pista, taxiway, torre kontrolu no área estasiona aeronave. Daudaun pista aviaun ho naruk metru 1.800 no sei estende ba metru 2.100.
Governu deside prosedimentu aprovizionamentu infraestrutura aeroportu Comoro, nune’e liuhusi prosesu naruk empreza manán-na’in iha rua husi Indonézia, empreza PT. Waskita Karya, ne’ebé haree kona-ba konstrusaun infraestrutura ho totál orsamentu millaun $72,5 no seluk mak PT Amythas haree liu ba jestaun ho orsamentu millaun $6,28.
Ba empreza husi Japaun konstrui terminál pasajeiru ho orsamentu hamutuk millaun $385,62, ne’ebé orsamentu ne’e prevee hosi Estadu no povu japonés.
Selebrasaun asinatura ne’e asiste direta husi Prezidente Repúblika, José Ramos Horta, Primeiru-Ministru, Taur Matan Ruak, inklui membru Governu balun, na’in ba empreza rua, no Embaixadór Japaun iha Timor-Leste, Tetsuya Kimura.
Notísia relevante: Governu selebra kontratu ho empreza tolu ba dezenvolvimentu Aeroportu Comoro
Jornalista: Arminda Fonseca
Editora: Maria Auxiliadora
