DILI, 22 Janeiru 2025 (TATOLI) – Primeiru-Ministru (PM), Xanana Gusmão, hateten espansaun ba Aeroportu Internasionál Prezidente Nicolau Lobato (AIPNL) Comoro seidauk halo, tanba hein dezeñu foun ho planu orsamentu ne’ebé klaru husi Ministériu Transporte no Komunikasaun (MTK).
Xanana Gusmão subliña katak Governu iha kompromisu atu harii aeroportu, maibé presiza dezeñu foun, tanba lakohi atu orsamentu ne’e gasta sein halo análize kle’an tuir nesesidade.
Kona-ba konstrusaun AIPNL ne’e seidauk realiza, tanba ida-ne’e iha orsamentu empréstimu boot husi Banku Dezenvolvimentu Azíatiku (ADB).
“Nune’e ami la dehan ba ADB dehan la foti osan, ita sei halo maibé kalma. Ami sei hein dezeñu no orsamentu hira mak ita atu uza ba konstrusaun ne’e husi MTK. Bainhira planu di’ak no prontu ona mak bele simu empréstimu. Agora, ha’u hein hela dezeñu”, Xefe Governu dehan ba jornalista sira iha Palásiu Governu, ohin.
Nia dehan investimentu boot tenke haree no halo análiza didi’ak molok implementa, “tanba aeroportu ne’e la’ós naran investe hotu, maibé aviaun kada loron ida mak tama no sai”.
Notisia relevante https://tatoli.tl/2024/11/08/pm-xanana-klarifika-osan-imprestimu-husi-2012-too-2017/
Xefe Ezekutivu ne’e fó ezemplu ba Aeroportu Rota do Sândalo Oe-cusse ne’ebé halo ho osan millaun $119 husi empreza PT. Wijaya Karya konsórsiu Tbk (WIKA), entre 2015 no 2018, maibé daudaun uza de’it iha rai-laran no ekipamentu balun la funsiona.
“Imi bá RAEOA haree aeroportu iha ne’ebá. Ita la uza [passenger boarding bridge] maske iha rua. Entaun, agora ita atu halo foun tenke tetu didi’ak”, nia afirma.
Dezde detembru 2024, Governu Timor-Leste liuhusi Ministériu Transporte no Komunikasaun hein nafatin konfirmasaun husi empreza PT. Waskita Karya konsórsiu Tbk husi Indonézia atu halo lansamentu ba konstrusaun pista AIPNL Comoro.
Governu anteriór ne’ebé lidera husi Taur Matan Ruak halo ona empréstimu millaun $135 husi Banku Dezenvolvimentu Aziátiku (ADB) hodi halo alargamentu ba pista, aterrajen, sistema iluminasaun no seluk tan.
Lembra katak Ezekutivu Japaun mós mantein apoia millaun $44 ba rekualifikasaun aeroportu Comoro.
Notisia relvante : https://tatoli.tl/2023/02/08/lansamentu-fatuk-dahuluk-ba-projetu-konstrusaun-aeroportu-comoro-realiza-iha-marsu/
Jornalista: Arminda Fonseca
Editora: Maria Auxiliadora
