DILI, 07 novembru 2024 (TATOLI) – Primeiru-Ministru (PM), Kay Rala Xanana Gusmão, iha loron daruak debate Orsamentu Jerál Estadu (OJE) 2025, faze jeneralidade iha Parlamentu Nasionál esklarese kona-ba osan imprestímu ne’ebé akontese iha tinan 2012 to’o 2017.
“Impréstimu sira ne’ebé halo iha tinan 2012 to’o 2017, ita bele dehan utiliza ba projetu sira ne’ebé ita halo hotu ona, ho totál ne’ebé ami asina iha tempu ne’ebá hamutuk, millaun $371. Maibé halo tiha dezeñu kalkula osan ne’ebé ita atu halo projetu sira ne’e hamutuk millaun $285 mak ita utiliza,” Xanana Gusmão hateten, iha Plenária Parlamentu Nasionál, kinta ne’e.
Nia dehan, husi imprestímu ne’e mak Governu utiliza neneik to’o agora osan iha fundu petróliferu sei iha no osan imprestímu selu ho neneik.
“Osan sira ne’e mak ita investe iha ekotis mak fó ona billaun $9 ba fundu petróliferu. Atu dehan katak husi JICA, ADB, Banku Mundiál osan ne’ebé ita hasai ka impresta husi sira hodi hala’o dezenvolvimentu to’o agora ita selu ona millaun $89 sei falta millaun $200-resin,” Xefe Governu ne’e dehan.
Kansela osan imprestímu
PM Xanana dehan tan, “osan imprestímu husi parseriu internasionál sira ne’ebé Governu anteriór asina iha tinan 2018-2022 ho totál osan atu impresta millaun $653, husi totál ne’e ADB millaun $388, Banku Mundiál millaun $220 no husi Australia millaun $45, maibé imprestímu sira ne’e ami deside kansela tanba ami haree osan boot liu no ladun nesesáriu.”
Tuir Xefe Governu katak tenke halo saida mak bele halo, nune’e kansela osan imprestímu hirak ne’e tanba balu atu harii aeroportu ne’ebé boot iha Dili maibé seidauk hatene lolos ba futuru fó benefisiu ka la’e ba Timor-Leste.
“Osan imprestímu hirak ne’e atu investe ba bee-moos iha kapitál Dili no Munisípiu, maibé ami haree ladun nesesáriu, sira mai esplika ho razaun la klaru ne’e duni ita kansela, organizasaun internasionál sira ne’e brani fó osan mai ita impresta tanba sira hatene ita sei selu, entaun iha kualidade ou la’e sira la intrese, ida ne’e mak Governu presiza haree didi’ak no kansela,” Xanana katak ba deputadu sira.
Notísia relevante:PM Xanana ho Vise-Prezidente Banku Mundiál diskute asuntu kooperasaun no impréstimu
Jornalista: Hortencio Sanchez
Editór: Florencio Miranda Ximenes
