EKONOMIA, HEADLINE

PM Xanana ho Vise-Prezidente Banku Mundiál diskute asuntu kooperasaun no impréstimu

PM Xanana ho Vise-Prezidente Banku Mundiál diskute asuntu kooperasaun no impréstimu

Primeiru-Ministru, Kay Rala Xanana Gusmão. Imajen Tatoli/Francisco Sony

DILI, 22 maiu 2024 (TATOLI) -Primeiru-Ministru (PM), Kay Rala Xanana Gusmão, akompaña hosi Ministru Obras Públikas (MOP), Samuel Marçal, hala’o enkontru ho Vise-Prezidente Banku Mundiál bá Rejiaun Ázia Orientál no Pásifiku, Manuela Ferro, hodi ko’alia kona-ba kooperasaun entre Timor-Leste ho Banku Mundiál liuliu kona-bá impréstimu.

“Hasoru malu ko’alia liu kona-bá kooperasaun ne’ebé Banku Mundiál halo hela ho ita liuliu temi kona-bá empréstimu sira ne’ebé IX Governu dehan para lai. Ne’ebé, sira komprende tanba bainhira ita hahú halo empréstimu ita atu poupa ka labele hasai kedan osan fundu petróleu, Japaun mak oferese empréstimu. Ida-ne’e mós ha’u ko’alia ona bá nia,” Primeiru Ministru katak.

Enkontru ne’e hala’o iha ámbitu konferénsia internasionál tuir Espíritu Bandung iha Bali Nusa Dua Convention Center, ohin.

Xefe Governu hatutan, antes ne’e iha ona diskusaun iha Parlamentu Nasionál (PN) kona-bá osan ida-ne’e husi empréstimu, no deputadu ida hatán dehan katak, Banku Mundiál mós hakarak, ne’ebé Timor Leste iha ona esperiénsia hosi empréstimu ne’ebé halo ho di’ak.

Kona-bá ne’e, Xanana mós informa ona bá Vise-Prezidente Banku Mundiál bá Rejiaun Ázia Orientál no Pásifiku, Manuela Ferro katak saida mak empréstimu, saida maka uluk halo tiha ona, servisu hotu tiha ona, projetu sira ne’e halo ho di’ak.

“Projetu sira ne’e sei hela hira ha’u la lembra. Ne’ebé Ko’alia tiha ona ho Ministra Finansa,  depois ha’u sei tau iha Konsellu Ministru. Sé bele karik, tinan mai ne’e saida mak sei iha atu selu empréstimu sira uluk ne’e, ita selu tiha kedan ona bá nune’e ita haree fali durante tinan-haat ne’ebé sei falta ne’e iha projetu estratéjiku importante tebetebes mak ita bele husu empréstimu. Nia temi kona-bá apoiu bá edukasaun, saúde. Ne’ebé ha’u hatán katak, Sim. Obrigadu bá imi-nia apoiu,” PM Xanana subliña.

Xefe Governu fó hanoin, tenke hatene katak fundu petróleu iha de’it billiaun $18, hosi fundu mina-rai ninian, osan reseita billiaun $9 tanba uluk hosi Ministra Finansa, Emilia Pires ho nia hanoin ne’ebé matenek tebes konsege investe osan ida-ne’e hodi hetan fali retornu.

“Agora ita iha billiaun $9 husi investimentu iha bons ne’e. Ho billiaun $9 ne’e mak agora ita iha osan biliaun $18,” Xanana hatutan.

Primeiru Ministru mós informa bá Manuela Ferro katak, Greater Sunrise iha hela negosiasaun ho Austrália, ho kompañia sira seluk kona-bá taxa, fahe reseita no buat sira ne’e hotu.

Alende ne’e, instalasaun infraestrutura bá Greater Sunrise atu mai iha Suai, Betano no Natarbora sei presiza osan barak, tanba ne’e Xanana Gusmão husu bá Manuela Ferro atu labele preokupa ho investimentu ki’ik sira ne’e, maibé atu haree iha ne’ebé mak Timor-Leste presiza liu, importante tebetebes no estratéjiku tebetebes.

Jornalista: Hortencio Sanches

Editór: Florencio Miranda Ximenes

iklan
iklan

Leave a Reply

iklan
error: Content is protected !!