PPN no Ministra Catherine diskute traballadór timoroan iha Reinu Unidu
DILI, 24 janeiru 2025 (TATOLI)–Prezidente Parlamentu Nasionál (PPN), Maria Fernanda Lay, sesta ne’e, simu vizita kortezia husi Ministra Estadu Reuni Unidu ba Indo-Pasífiku, Catherine West.
“Ita espera bele organiza traballadór iha UK di’ak liu komparasaun ho inísiu, sira mós kontribui ba ita-nia rai boot tebes, liuliu ba sira-nia família nomós iha futuru ita espera katak sira-nia oan ne’ebé moris iha ne’ebá bele muda ita-nia maneira la’ós de’it kultura mais informasaun foun no kultura ba ita-nia jerasaun ne’ebé sei mai iha futuru, ita espera sira fila bele lori kultura foun sira ne’e mai hodi dezenvolve di’ak liu ita-nia rai,” PPN hateten hafoin enkontru ne’e, iha PN.
Fernanda Lay konsidera vizita ne’e importante tanba iha tinan-ida nia laran, ekipa husi Reinu Unidu halo vizita Timor-Leste dala-tolu ona, tanba ne’e haree katak kooperasaun ho nasaun ne’e importante tebes iha kontextu ekonomia tanba traballadór timoroan barak mak ba iha ne’ebá.
Notísia relevante : Xanana no Catherine West aborda kona-ba apoiu Reinu Unidu ba Timor-Leste
PPN hato’o ba Ministra Reinu Unidu kona-ba traballadór timoroan ne’ebé bá serbisu iha Reinu Unidu ne’e halo sira-nia vida própriu ho kontexu hanesan iha Reinu Unidu, “ita espera esperiénsia di’ak ne’ebé sira hola parte iha Reinu Unidu bele sai ezemplu ba ita-nia traballadór sira seluk ne’ebé bá serbisu iha rai seluk hodi labele sai sidadaun ne’ebé ba serbisu ho dalan ilegál tanba bainhira sira sai husi sistema ema sei deporta ita.”
“Ha’u hanoin katak serve ezemplu no organiza-an didi’ak hodi ita iha oportunidade hodi serbisu iha nível di’ak liu, la’ós traballadór normál non skill mais bele skill ne’ebé a’as liu, para ida-ne’e ha’u hanoin Governu ho Governu bele halo serbisu ida ne’e,” nia akresenta.
PPN agradese mós ba apoiu Reinu Unidu nian durante ne’e ba Timor-Leste ninia independénsia no iha prosesu dezenvolvimentu nasaun.
“Ha’u agradese ba sira-nia apoiu durante ita-nia indepedénsia no ita tama ona ba Organizasaun Mundiál Komérsiu (OMK) ho ASEAN iha futuru, sira bele ajuda ita iha preparasaun no sira hato’o katak espesialista husi sira-nia rai sei mai fó apoiu ita iha kontextu ida-ne’e,” nia katak.
PPN nota Timor-Leste iha relasaun di’ak tebes iha kontextu serbisu hamutuk ho rai-li’ur tanba nasaun barak mak hakarak ajuda.
Diskute mudansa klimátika
PPN haktuir, durante sorumutuk, parte rua ko’alia mós kona-ba asuntu mundansa klimátika ne’ebé ohin loron sai preokupasaun mundu inklui Timor-Leste, nune’e presiza iha kooperasaun serbisu hamutuk hodi haree.
“Ohin, ami ko’alia situasaun mudansa klimátika ne’ebé afeta Timor-Leste hanesan illla ida no aumenta kiak la’ós iha Timor maibé iha mundu tomak, ita haree katak ahi han iha Ámerika ne’e mós problema boot mundu ninian,” nia tenik.
Toka mós kona-ba inter-parlamentár, ne’ebé sira bele serbisu hamutuk ho membru Parlamentu liuhusi grupu amizade liuliu iha área fiskalizasaun oinsá bele fiskaliza di’ak liu implementasaun serbisu Governu ho instituisaun ne’ebé de’it mak uza orsamentu Estadu atubele prevene korrupsaun hodi bele fó benefísiu di’ak liu ba povu.
“Ne’ebé ha’u hanoin Timor-Leste sei apreende barak tebes ho nasaun sira ne’ebé ita hola parte, la’ós ho sira ne’ebé hola parte hanesan membru ba organizasaun sira ne’e, maibé sira ne’ebé iha mós amizade ho Timor-Leste bele fó benefísiu,” nia katak.
Ministra Catherine West hato’o agradesementu ba partisipasaun traballadór timoroan iha Reinu Unidu.
“Sira agradese partisipasaun husi ita-nia traballadór sira iha ne’ebá no sira mós presiza ita-nia traballadór. Ne’ebé, hanoin ha’u mós ohin husu se bele entre Governu prepara didi’ak para ba ne’e sira ho skill ne’ebé presiza duni iha ne’eba,” nia tenik.
Jornalista : Nelson de Sousa
Editora : Julia Chatarina
