DILI, 24 Janeiru (2025) – Reinu Unidu apoia Timor-Leste, liuhusi Ministériu Komérsiu no Indústria (MKI) hodi fó formasaun asisténsia téknika hodi prepara dokumentu ba implementasaun regra orijen produtu nian.
Ministru Komérsiu no Indústria, Nino Pereira, hateten Ministra Estadu Reinu Unidu ba Indo-Pasífiku, Catherine West, ohin, halo vizita bá MKI hanesan hametin kooperasaun entre país rua ne’e.
“Reinu Unidu fó apoiu asisténsia téknika ba ita hodi prepara dokumentu legál ida kona-ba implementasaun regra orijen. Regra orijen ne’e nia konteúdu nasionál liga ba produtu hotu ne’ebé ita halo produsaun iha rai-laran, maibé atu detallu ita sei lori bá Konsellu Ministru”, Nino Pereira, dehan ba jornalista sira iha edifísiu MKI Bebora, Dili, ohin.
Nia esplika katak ba área formasaun tekníka ne’e liga ba komérsiu nian, oinsá MKI dezenvolve preferensiál ba produtu ne’ebé iha, liuliu negosiasaun kuantidade produsaun nian Timor-Leste bele troka komérsiu entre setór privadu iha rai-laran no nasaun ba ASEAN.
“Dokumentu ne’e ita finaliza ona espera katak iha trimestre dahuluk ita sei aprezenta ba iha Konsellu Ministru (KM) hodi haree. Ohin, ita mós husu nafatin ba Governu Reinu Unidu atu haree mós oinsá kontinua akompaña ita iha prosesu integrasaun ba iha organizasaun ASEAN liuhusi sira-nia relasaun no nasaun membru ASEAN sira seluk bele fó oportunidade ba prosesu integrasaun ba ASEAN”, nia dehan.
Govenante ne’e dehan parte Reinu Unidu mós nafatin hatudu prontidaun hdoi apoiu MKI iha parte prepara rekursu umanu, liuliu ba tékniku ninian.
“Ami sente ida ne’e klosok ida mai ami, tanba matein iha espíritu kooperasaun. Reinu Unidu mós apresia ba kooperasaun ne’ebé iha no husu kontinua hametin liután kooperasaun sira ne’ebé iha, liuliu evolusaun dezenvolvimentu komérsiu no indústria nian”, dehan.
Notísia relevante: Xanana no Catherine West aborda kona-ba apoiu Reinu Unidu ba Timor-Leste
Jornalista : Arminda Fonseca
Editora : Maria Auxiliadora