DILI, 24 janeiru 2025 (TATOLI)–Sekretáriu Estadu Komunikasaun Sosiál (SECOMS, sigla portugés), Expedito Dias Ximenes, hateten Agéncia Notisiosa de Timor-Leste, Institutu Públik (TATOLI, I.P) no Radiu Telivizaun Timor-Leste, Empreza Públiku (RTTL, E.P) sei halo transmisaun direta ba jogu Komunidade Nasaun Ko’alia Lian Portugés (CPLP-sigla portugés) ne’ebé sei hala’o iha Timor-Leste.
Notísia Relevante: Governu garante sei konklui hadi’a infraestrutura antes jogu CPLP hala’o
“Jogu CPLP ne’e, TATOLI ho RTTL sei halo transmisaun direta. Nia formatu ami sei foti hanesan vizita Sua Santidade Papa Francisco nian, tanba eventu ida-ne’e importante mós ba ita-nia nasaun tanba nasaun ualu mak mai partisipa. Ne’ebé, ita tenke halo duni transmisaun direta,” Governante ne’e hateten ba Agência TATOLI iha salaun edifisiu Ministériu Juventude Desportu Arte no Kultura (MJDAK), Lecidere, sesta ne’e.
Iha eventu ne’e, nia dehan, RTTL sei sai nafatin hanesan host brokesting atu fó output ba telivizaun nasaun CPLP sira-nian no telivizaun seluk ne’ebé hakarak halo transmisaun ba jogu ne’e.
“Ba plataforma sira karik presiza sei hetan mós output husi RTTL, ita sei koordena atu fahe hotu ba mídia sira,” nia tenik.
Transmisaun direta ne’ebé mídia estatál rua atu halo ne’e ba serimónia abertura no enseramentu, maibé iha oportunidade ba jogu sira-ne’ebé hanesan futeból, atletizmu, basketból no voleiból sei halo transmisaun direta permanente.
“Mibé, ita sei haree hotu kapasidade RTTL nian ho nia ekipamentu sira. Konserteza transmisaun direta ne’e ba serimónia abertura no enseramentu, maibé jogu balun importante, ita sei halo transmisaun direta maibé tuir kapasidade RTTL nian,” nia dehan.
Jogu CPLP tinan ida-ne’e sei hetan partisipasaun másimu husi Estadu-membru sira, ho delegasaun hanesan Angola mai ho partisipante 101, Brazil 101, Cabo Verde 101, Guiné-Bissau 61, Guiné Ekuatoriál 35, Mosambike 70, Portugál 101, São Tomé e Prínsipe 35 no Timor-Leste 101.
Eventu importante ida-ne’e hatudu Timor-Leste nia kompromisu atu haburas interkámbiu kulturál no atlétiku iha komunidade CPLP nia laran.
Notísia Relevante: Komisaun G rona MJDAK nia preparasaun realiza jogu CPLP iha TL
Jornalista : Hortencio Sanchez
Editór : Cancio Ximenes
