SUÍÇA, 24 janeiru 2025 (TATOLI) – Prezidente repúblika, José Ramos Horta otimista katak Timor-Leste (TL) sei sai membru Asosiasaun nasaun sudezte-aziátiku (ASEAN, sigla inglés) iha tinan ne´e alende kontinua buka kompleta roteiru (roadmap).
Xefe Estadu hateten, TL tinan ne´e tama ona ba ASEAN. Tuir roteiru-mapa, kalendáriu anuál ASEAN ninian Timor-Leste kumpri ona roteiru ne´e 80% liu no nasaun membru ASEAN barak maka konkorda katak la presiza to´o 100%. Maibé, sei kumpri nafatin roteiru ne´e to´o ramata.
“Ita tenki nafatin ezekuta roadmap ne’e. Signifika, haforsa liután ita-nia instituisaun sira, ita-nia partisipasaun rejionál, asesu ba merkadu, kria klima ne´ebé di´ak liután ba investidór sira,” Horta ba Agência TATOLI, iha otel Seehof, Davos, Suiça, kinta ne´e.
Notísia relevante: https://tatoli.tl/2024/07/26/ministru-negosiu-estranjeiru-membru-asean-apoia-adezaun-timor-leste/
Prezidente repúblika, José Ramos Horta afirma mós katak iha tinan-2025 ne´e marka istória ida tan ba Timor-Leste tanba iha eventu rua ne´ebé sei énfaze iha istória TL nian maka, dahuluk, adezaun ba ASEAN no daruak mak esperansa xefe Estadu nian ba Governu TL no Austrália atu finaliza akordu kona-ba dezenvolvimentu Greater Sunrise nian.
Notísia relevante: https://tatoli.tl/2024/12/21/australia-no-timor-leste-komprometidu-asegura-kampu-greater-sunrise-iha-tasi-timor/
Autoridade Estadu TL ne´e hatutan, ajenda barak ne’ebé prezidente repúblika tuir iha Fórum Ekonómiku Mundiál iha Davos tinan ida-ne’e, liga liu ba ajenda ASEAN ninian hanesan ASEAN nia jornada ba unidade, ida-ne’ebé PR tuir mós enkontru ho líder sira husi sudeste-aziátiku ninian hodi ko´aalia kona-ba pás no jeopolítiku ASEAN.
No, seluk tan maka navegasaun ASEAN nia hotspot, atividade ne hanesan diskusaun sira entre nasaun aziátiku nian hodi haree ba problema mundiál nia impaktu ba ASEAN.
Notísia relevante: https://tatoli.tl/2025/01/22/pr-horta-ho-sekjer-asean-aborda-progresu-tl-kumpri-roteiru/
Entretantu, organizasaun rejionál ASEAN, ne´ebé estabelese iha 8 agostu tinan-1967 ne´e iha pilar tolu mak hanesan polítika, ekonomia no sósiu-kulturál. No, Timor-Leste hanesan nasaun ida iha rejiaun aziátika komprometidu atu adere liuhusi kumpre roteiru sira ne´ebé mak iha.
Jornalista: Jogerjo Guterres
Editór: Rafael Ximenes de A. Belo
