OÉ-CUSSE, 25 Janeiru 2025 (TATOLI) – Diretór Nasionál Apoia Administrasaun suku iha Ministériu Administrasaun Estatál (MAE), Celestinho Marques, fó-sai kandidatu xefe suku na’in-rua sei hakat ba eleisaun segunda volta tanba iha rezultadu kontajen votu la liu barreira 50%+1.
“Rezultadu ne’ebé ohin fó sai ona, suku foun Kutete iha aldeia rua, Mahata ho Sanifena no sentru votasaun iha rua, rezultadu eleisaun iha Mahata ohin ita haree ona, númeru sorteiru 2 mak vota barak liu, tuir mai númeru 1 no ikus liu mak númeru 3. Ne’ebé kontajen finál provizoriamente kandidatu númeru 1 ho 2 mak hakat ba segundu volta. Maibé aban ita sei halo apuramentu finál konsentra iha sentru sede suku Kutete,” dehan Diretór Nasionál ne’e ba TATOLI,I.P iha iha sentru votasaun Mahata, ohin.
Notísia relevante:Abitante Kutete ho esperansa xefe suku eleitu garante pás no estabilidade
Kandidatu na’in-tolu mak konkorre iha eleisaun suku mak hanesan kandidatu dahuluk, Berjamin Bana, daruak José António Bana no ikus liu mak Mario Queno.
Totál eleitór iha suku Kutete hamutuk 800-resin, kompostu husi aldeia Mahata no aldeia Sanifena.
Hafoin eleisaun órgaun suku ne’e komesa no halo kontajen finál iha sentru votasaun sira mak hanesan, kandidatu númeru 01 hetan votu 340, kandidatu númeru 02 hetan votu 420 no kandidatu númeru 03 hetan votu 108. Ho totál votu nulu 10 no votu branku iha rua.
“Kandidatu na’in-tolu ne’e la to’o tarjetu ka barreira, katak atu manán maioria tenke 50%+1, ne’ebé ohin ita haree rezultadu provizóriu, nune’e posibilidade ita hakat ba segunda volta iha inisíu Fevereiru,” nia dehan.
Tuir lei númeru 9/2016 no Dekretu Governu númeru 14/2016, katak hafoin loron 15 kontinua kedas ba eleisaun segunda volta, ba kandidatu sira-ne’ebé avansa ba eleisaun segunda volta, sura husi loron eleisaun 25 Janeiru 2025, ne’ebe sei akontese iha Fevereiru.
Iha fatin hanesan, Kandidatu Xefe Suku ho númeru sorteiu 1, Benjamin Bana, sente orgullu ho desizaun ne’ebé povu konfiansa liuhusi votasaun, nune’e nia sei prepara másimu atu hakat segunda volta.
Foto Tatoli/Abílio Elo Nini
“Karik ko’alia kona-ba votu, ita sei avAlia fila-fali liuhusi reuniaun ida, ne’ebé ha’u garante maibé sei haree husi povu nia desizaun, maibé ein-jerál , ha’u kontente no agradese ba eleitór sira hotu tanba ohin lakon sira-nia tempu mai iha ne’e atu tuir eleisaaun,” Kandidatu Xefe Suku ne’e afirma.
Iha fatin hanesan, José António Bana, nu’udar kandidatu Xefe suku ho númeru sorteiru 2, hato’o nia respeitu ba desizaun ne’ebé povu fó, tanba ne’e mak realidade. Ho votu 420 simu ho laran luak.
“Ida-ne’e servisu bo’ot ba ha’u, atu hetan eleitór barak, tanba votante mak hanesan ne’e ona, ne’ebé desizaun hotu povu mak sei deside, maibé ba ha’u karik fó fiar liu mai ha’u, prontu atu lidera suku Kutete, ho nia kompromisu katak, ha’u sei la halo diskriminasaun ba povu maibé trata ema hotu ho dignu,” kandidatu ne’e promete.
Entretantu eleisaun órgaun suku iha Monemeko, daudaun sei kontinua kontajen hela, ne’ebé to’o kalan mak foin apuramentu termina.
Tuir observasaun Jornalista TATOLI,I.P iha terenu nota katak situasaun la’o ho ambiente hakmatek tanba hetan seguransa másimu husi PNTL no hetan observasaun direta husi Ministériu Administrasaun Estatál (MAE) no PDHJ.
Notísia relevante:Komunidade suku foun Monemeko no Kutete preparadu partisipa eleisaun
Jornalista: Abílio Elo Nini
Editór: Florencio Miranda Ximenes
