OÉ-CUSSE, 21 Janeiru 2025 (TATOLI) – Sekretáriu Rejionál ba Asuntu Administrasaun, Andre Lao, informa, komunidade iha suku foun rua hanesan Monemeko no Kutete, preparadu ona atu partisipa iha eleisaun suku ne’ebé akontese iha loron 25 Janeiru 2025.
Molok ne’e, Suku rua referidu nu’udar aldeia ne’ebé pertensia ba suku Costa, sub-rejiaun Pante Makasar, hanesan aldeia Mahata hodi nakfilak ba suku Kutete no aldeia Lakufoan no Oétfo nakfilak ba suku Moneko.
Notísia relevante:Aldeia tolu iha Costa Oé-Cusse preparadu sai suku
“Suku rua ne’e agora preparadu ona, tanba antes ne’e ami hamutuk ho komunidade sira, ekipa husi Ministériu Administrasaun Estatál, ho CNE no STAE halo ona sosializasaun kona-ba lei suku liuliu eleisaun suku, ne’ebé aban to’o bainrua alokasaun materiál sensitivu no la’os sensitivu ba fatin rua ne’e, atu prepara iha loron 25 Janeiru hahú eleisaun,” Andre Lao, ba Ajénsia Tatoli iha Oé-Cusse.
Fasilidade ba suku rua ne’e, garantidu tanba iha autoridade sesante konstrui ona edifisiu no kompleta kedas ho mobiliáriu hanesan meja no kadeira.
Iha fatin hanesan, Diretór CNE Oé-Cusse, Tomas Oqui Meta, informa, kandidatu husi suku rua-ne’e submete ona iha orgaun eleitorál Oé-Cusse hodi prepara konkorre iha sesta semana ne’e.
Suku Monemeko subemete kandidatu na’in-neen mak hanesan, númeru sorteitu dahuluk Alselmo Coi Sau Noah, Bernadete Sansinha, Daniel Teme, Fernando de Souza Nekat, Jorge Fikus Abi no José Sani.
Notísia relevante:Profíl suku pilotu Kutete Oé-Cusse
Enkuantu, Suku Kutete submete kandidatu tolu mak mak hanesan, Berjamin Bana númeru 1, daruak mak José António Bana no ikusliu mak Mario Queno.
“Antes ne’e, ami hala’o ona edukasaun sivíka ba komunidade sira, ne’ebé ohin no aban materiál sei to’o Oé-Cusse atu halo pakotementu,” nia dehan.
Tuir konfirmasaun husi STAE Oé-Cusse, katak daudaun ne’e materia sensitivu no la sensitivu, ekipa lori hela dalan ka viajén husi Dili mai Oé-Cusse ho materiál, sei kontinua halo pakotementu no formasaun ba tékniku eleitorál iha loron kuarta, 22 Janeiru.
Tuir dadús iha suku Kutete totál uma-kain hamutuk 516 ho populasaun hamutuk 2.281 kompostU husi mane 1.104 no feto 1.177 hodi fahe ba aldeia rua mak aldeia Mahata no Sanifena. Kona-ba suku Monemeko, totál populasaun hamutuk 2.335, kompostu husi mane 1.178 no feto 1.1157 ho totál uma-kain 456.
Suku foun rua ne’e estabelese husi VIII Governu Konstitusionál, lidera husi Jenerál Taur Matan Ruak no nia estabelesementu bazeia ba Lei Suku númeru 19/2023 ne’ebé previstu iha artigu 91, iha-neʼebé fó kompeténsia ba Ministériu Administrasaun Estatál (MAE) deside kriasaun suku foun referidu. Nune’e, iha RAEOA totál suku tuan hamutuk 18 husi postu sub-rejiaun haat, mak hanesan Oésilo, Pássabe, Nítibe no Pante Makasar.
Notísia relevante:MAE diálogu ho komunidade Monemeko Oé-Cusse prepara sai suku iha 2024
Jornalista: Abílio Elo Nini
Editór: Florencio Miranda Ximenes
