Abitante Kutete ho esperansa xefe suku eleitu garante pás no estabilidade
OÉ-CUSSE, 25 Janeiru 2025 (TATOLI) – Abitante iha suku foun Kutete, Rejiaun Administrativa Espesiál Oé-Cusse Ambeno (RAEOA), ezserse direitu votu ho esperansa katak xefe suku eleitu bele garante pás no estabilidade hodi lori dezenvolvimentu ba suku referidu.
Kandidatu na’in-tolu mak konkorre iha eleisaun suku mak hanesan kandidatu dahuluk, Berjamin Bana, daruakJosé António Bana no ikus liu mak Mario Queno.
Notísia relevante:Profíl suku pilotu Kutete Oé-Cusse
“Ami agradese ba Governu tanba agora ami sai ona suku ida. Ne’ebé ami-nia esperansa mak ne’e, ohin xefe suku eleitu persiza servisu hamutuk xefe aldeia no komunidade sira atu harii pás no estabilidade hodi lori dezenvolvimentu ita-nia suku,” Komunidade Suku Kutete, Joaquin Bana, hatete ba jornalista sira hafoin ezerse direitu votu iha Mahata-Kutete, ohin.
Iha fatin hanesan, Komunidade Adelia Coa, sente kontente tanba bele hamriik mesak nu’udar suku foun iha Oé-Cusse. Nune’e husu Xefe Suku eleitu atu buka meiu oinsa tau-matan ba joven atubele partisipa iha edukasuan formal no non formal, nune’e bele asesu ba kampu traballu.
Komunidade Minguel Ceu, reforsa espera xefe suku eleitu labele halo diskriminasaun iha suku laran, maibé serbisu hamutuk ho komunidade tomak atubele lori dezenvolvimentu mai iha suku ne’e.
Notísia relevante:Komunidade suku foun Monemeko no Kutete preparadu partisipa eleisaun
“Agora ita halo votasaun, ne’e hanesan maun-alin de’it, semak manán, ita labele hakilár tun-sa’e, maibé ne’e povu suku Kutete nia. Prioridade dahuluk mak ne’e tenke kria unidade iha suku hodi apoia programa Governu atu mai implementa iha suku no labele diskrimina povu iha suku laran,” nia fó hanoin.
Tuir dadús iha suku Kutete totál uma-kain hamutuk 516 ho totál populasaun 2.281, kompostu mane 1.104 no feto 1.177. Suku Kutete iha aldeia rua mak aldeia Mahata no Sanifena.
Tuir observasaun, eleisaun suku ne’ebé akontese iha Oé-Cusse, iha sabadu ne’e ba suku rua Kutete ho suku Monemeko ho totál populasaun hamutuk 2.335 komposta husi mane 1.178 no feto 1.1157 ho totál uma-kain 456.
Suku foun rua ne’e estabelese hosi VIII Governu Konstitusionál, lidera husi Jenerál Taur Matan Ruak no nia estabelesimentu bazeia ba Lei Suku númeru 19/2023 ne’ebé previstu iha artigu 91, iha-neʼebé fó kompeténsia ba Ministériu Administrasaun Estatál (MAE) deside kriasaun suku foun referidu. Nune’e, iha RAEOA totál suku tuan hamutuk 18 husi postu sub-rejiaun haat, mak hanesan Oésilo, Pássabe, Nítibe no Pante Makasar.
Notísia relevante:MAE diálogu ho komunidade Monemeko Oé-Cusse prepara sai suku iha 2024
Jornalista: Abílio Elo Nini
Editór: Florencio Miranda Ximenes
