Eleisaun órgaun suku iha Monemeko hakat ba segunda volta
OÉ-CUSSE, 26 Janeiru 2025 (TATOLI) – Responsavél Tékniku iha Sekretáriu Tékniku Administrasaun Eleitorál (STAE), Rejiaun Administrativa Espesiál Oé-Cusse Ambeno (RAEOA), Grigorio do Santos Neno, fó-sai rezultadu votasaun ba eleisaun lideránsa komunitária iha suku foun Monemeko, husi kandidatu na’in-neen laiha ida mak manán maioria ka liu barreira 50%+1nune’e sei hakat ba eleisaun segunda volta.
“Iha suku Monemeko iha sentru votasaun rua, ida iha sede aldeia Oétfo no iha Lakufoan, ne’ebé rezultadu kontajén iha sentru votasaun rua ne’e, kandidatu númeru 1 mak hetan votu 237, ne’ebé ita haree kandidatu na’in-neen laiha ida liu barreira 50%+1. Nune’e sei hakat tan ba eleisaun daruak,” Grigorio do Santos Neno hateten ba Ajénsia TATOLI.I.P, via telefonika, ohin.
Notísia relevante:Eleisaun suku iha Kutete hakat ba segunda volta
Foto Tatoli/Abílio Elo Nini
Tuir dadús husi STAE katak, totál eleitór iha suku Monemeko hamutuk 1000-resin, maibé na’in-895 mak konsege ezerse direitu votu iha loron eleisaun.
Totál eleitór ne’ebe ezerse nia direitu na’in-895, kompostu husi iha sentru votasaun sede aldeia Oétfo na’in-504 no iha aldeia Lakufoan na’in-391.
Nune’e.,kontajen votu iha sentru votasaun rua ne’e mak kandidatu númeru dahuluk Anselmo Coi Sau Noah, hetan votu 237, tuir kedan kandidatu númeru 6, José Sani hetan votu 198, kandidatu númeru 3, Daniel Teme hetan votu 161, kandidatu númeru 2 Bernadete Salsinha, hetan votu 90, kandidatu númeru 5, Jorge Ficus Abi hetan votu 89 no kandidatu númeru 4, Fernando de Souza Necat, hetan 88. Enkuantu votu nulu 30 no branku ida.
“Ita apuramentu finál hotu mak ita foin hatene loloos kandidatu semak atu avansa ba eleisaun segunda volta, tanba ita observa kandidatu ida la hetan votu liu barreira 50%+1, nune’e sei avansa tan ba eleisaun volta daruak,” nia informa.
Bazea lei númeru 9/2016 no Dekretu-Governu númeru 14/2016, katak hafoin loron 15 kontinua kedas ba eleisaun segunda volta, ba kandidatu sira-ne’ebé avansa ba eleisaun segunda volta, sura husi loron eleisaun 25 Janeiru 2025, ne’ebé sei akontese iha Fevereiru.
STAE observa durante eleisaun iha suku Monemeko situasaun la’o ho hakmatek tanba hetan seguransa másimu husi PNTL no observasaun direta husi Ministériu Administrasaun Estatál (MAE) no PDHJ.
Notísia relevante:Abitante Kutete ho esperansa xefe suku eleitu garante pás no estabilidade
Jornalista: Abílio Elo Nini
Editór: Florencio Miranda Ximenes
