DILI, 26 Janeiru 2025 (TATOLI) – Rezultadu apuramentu ba eleisaun suku iha Baduro hatudu Faustino de Almeida eleitu ba xefe suku ho votu 365, informa Ofisiál Sekretariadu Tékniku Administrasaun Eleitorál munisípiu Lautém, Osório dos Santos.
Eleisaun órgaun suku ba Baduro nian iha kandidatu na’in-tolu mak Faustino Dias de Almeida ho votu maioria 365, Inácio Paulo Fernandes 89 no Paulo dos Santos Dias 145.
“Totál eleitor ne’ebé suku Baduro rejistu hamutuk 949, husi númeru ida ne’ebé tuir eleisaun hamutuk 616. Halo kontajen de votu husi aldeia ne’e iha nulu hamutuk ualu, branku 0”,Osório dos Santos dehan ba Tatoli via telefone, ohin.
Suku Baduro iha aldeia lima, nune’e mak sentru votasaun mós tau lima mak hanesan Irapala, Tamara, Laclo-Manu, Malae-Lada, Luadau.
Iha sorin seluk, xefe suku eleitu Faustino de Almeida, hateten konfiansa ne’ebé povu fó ne’e la’ós oportunidade, maibé responsabilidade.
“Husi rezultadu ne’ebé iha, ha’u hanesan sai manán-na’in, ida-ne’e responsabilidade boot ida mai ha’u oinsá sai povu sira-nia matan, tilun iha ha’u-nia mandatu”, nia promete.
Durante mandatu nia sei fó prioridade mak sharee uluk ba problema sosiál sira ne’ebé komunidade hasoru hanesan estrada, bee-moos no liña eletridade, tanba suku Baduro iha aldeia lima ne’e, Tamara rasik seidauk asesu ba leletrisidade.
Notísia relevante: Faustino de Almeida provizoriamente hetan votu maioria iha suku Baduro
Jornalista : Arminda Fonseca
Editora : Maria Auxiliadora
