DILI, 26 Janeiru 2025 (TATOLI) – Eleisaun ba lideransa komunitária ba suku 18 iha 25 janeiru ho rezultadu hatudu katak suku 13 mak manán maioria iha ronde dahuluk no suku lima mak tama ba ronde daruak.
“Tuir regra eleisaun suku nian katak depois 15 dias, realiza hikas segunda volta iha loron 10 Fevereiru tinan ne’e”, Diretór Jerál Sekretariadu Tékniku Administrasaun Eleitorál (STAE), Elviro Fernandes Moniz, hatete via telefone, domingu ne’e.
Diretór Jerál STAE informa, suku 13 ne’ebé xefe suku eleitu iha 25 janeiru ne’e sei hala’o reuniaun hodi hili lia-na’in no juventude feto no mane iha loron 05 fevereiru.
Suku 13 ne’ebé manán maioria mak Karahili, Hurai-Raco (Aileu) Poetete, Koliate Leten, Asui-Lau (Ermera) Kabaida Makasae, Builai, Ueromata (Baukau), Baduro (Lautein), Laku-Mesak ( Manatutu), Tahu-Bein (Manufahi) Makadiki Uaitame, Makadiki Baixu (Vikeke) sira nia Xefe Suku Eleitu iha segunda volta. Suku 5 hanesan Kutete, Mone Meko (RAEOA), Poetete Lodudu, Poetete Vila (Ermera) no Iliheu (Manatutu) avansa ba segunda volta.
Orsamentu ba eleisaun suku 18 hamutuk $419.215,50, kompostu hosi servisu profisionál $127.428,00.
Lojístika eleitorál $22.456,00, enkargu instalasaun $1.940,00, aluger $6.865,00 1, kombustivel $20.000,00, formasaun no semináriu $40.620,00, dezlokasaun nasionál- munisipál-nasionál $136.400,00, imprime (akta, lista pursentu ida, manuál $63.506,50, formasaun, aktas, kartaun identidade, poster, banner, buletin votu).
Estabelesementu suku foun iha Timor laran bazeia ba Lei Suku númeru: 19/2023 ne’ebé previstu iha artigu 91, fó kompeténsia ba Ministériu Administrasaun Estatál (MAE) deside kriasaun suku foun referidu.
Notísia relevante : Eleisaun Suku husi munisípiu ualu iha 2025
Jornalista: Osória Marques
Editór : Zezito Silva
