DILI, 26 janeiru 2025 (TATOLI)—Kandidatu Valente Matos eleitu hodi lidera suku foun Hurai-Raco, postu administrativu Aileu Vila, munisípiu Aileu, ho votu 564, liuhusi eleisaun órgaun suku ne’ebé hala’o iha sábadu (25/01/2025).
“Hanesan xefe suku foun Hurai-Raco ne’ebé konkore iha eleisaun órgaun suku horisehik, ha’u eleitu ho votu 564 husi eleitór 692,” Valente ba TATOLI via telefónika, domingu ne’e.
Valente agradese ba komunidade suku Hurai-Raco ne’ebé fó konfiansa tomak ba nia hodi lidera suku referidu.
Notísia relevante: Abitante suku Hurai-Raco 692 ezerse direitu votu iha eleisaun
“Nu’udár suku foun ne’ebé foin hamriik, ha’u bele dehan suku ne’e iha hela faze konstrusaun. Ha’u komprometidu serbí ho fuan no laran liuhusi serbisu hamutuk ho joven sira hodi garante dezenvolvimentu, estabilidade no pás iha suku laran,” nia adianta.
Suku Hurai-Raco antes ne’e hola parte iha suku Seloi-Kraik, maibé iha 2023 hato’o sira-nia pedidu bá Autoridade Administrasaun Munisípiu Aileu, hakarak haketak an sai suku foun. Nune’e, iha 2025, Governu aprova pedidu ne’e no konsidera sai nu’udár suku foun ida husi postu administrativu Aileu Vila.
Suku Hurai-Raco iha aldeia rua mak hanesan aldeia Mau-Rusa no Taratihi. Entretantu, kandidatu ba xefe suku Hurai-Raco nu’udár kandidatu úniku.
Eleisaun ba líder suku foun hala’o mós iha suku Karahili, postu Administrativu Remexio, munisípiu Aileu. Suku Karahili antes ne’e hola parte iha suku Asumau maibé iha 2025 suku Karahili deside haketak an. Kandidatu xefe suku ba suku foun referidu iha na’in rua.
Estabelesementu suku foun iha Timor laran bazeia ba Lei Suku númeru: 19/2023 ne’ebé previstu iha artigu 91, fó kompeténsia ba Ministériu Administrasaun Estatál (MAE) deside kriasaun suku foun referidu.
Jornalista: Natalino Costa
Editór: Xisto Freitas da Piedade
