DILI, 29 janeiru 2025 (TATOLI)–Prezidente Interinu Liga Futeból Timor-Leste, Octavio da Conceição ho ekipa hasoru malu ho Ministru Juventude, Desportu, Arte, no Kultura (MJDAK), Nelio Isaac Sarmento iha edifisiu MJDAK hodi ko’alia kona-ba preparasaun liga nian no atu realiza kongresu iha fevereiru, nune’e bele hili fali lideransa foun.
Notísia Relevante: Prezidente FFTL enkoraja klube primeira-segunda divizaun prepara-aan tuir liga
“Enkontru ne’e sentra iha preparasaun ba Kongresu LFTL no planu atu estabelese liga futeból ida ne’ebé kompetitivu,” Octavio hateten hafoin remata enkontru iha salaun MJDAK, Lecidere, , tersa (38 janeiru 2025) ne’e.
Nia subliña, nesesidade ba órgaun ezekutivu ne’ebé forte no legalmente rekoñesidu hodi garante organizasaun atividade liga nian ne’ebé la’o ho di’ak.
“Ami hasoru malu ho Ministru hodi halo relatóriu kona-ba progresu Kongresu LFTL nian no hodi diskute estratéjia sira atu organiza liga kompetitivu ida. Estrutura ezekutivu ne’ebé sólidu mak xave atu garante katak liga funsiona tuir regra no programa ne’ebé konkorda ona,” nia dehan.
Nia hatutan, Asembleia Jerál Liga Futeból Timor-Leste nian planeia ona ba fulan-fevereiru 2025, fó tempu ba klube sira hodi prepara no permite ba kandidatu sira-ne’ebé iha interrese hodi kandidata-aan ba prezidénsia liga nian.
Nia dehan, bainhira kongresu la’o klube fundadór hamutuk 25 mak iha direitu absoluta hodi vota bainhira iha timoroan balun kandidata aan hakarak sai Prezidente LFTL hodi lidera liga.
Iha sorin seluk, Diretór Jerál Desportu, João M. Rodrigues, elojia LFTL nia esforsu hodi reativa fali liga ne’e hafoin tinan barak la ativu.
“Ida-ne’e hanesan pasu krusiál ida hodi hamoris fali futeból iha Timor-Leste. Governu, hamutuk ho FFTL no LFTL, sei servisu hamutuk hodi garante liga nia susesu,” nia hateten.
Istória badak kona-ba liga
Iha tinan 2015, Governu liuhusi Sekretáriu Estadu Juventude no Desportu (SEJD) hamutuk ho timoron sira-ne’ebé iha paixaun ba bola deside harii Liga Futeból Amadór (LFA).
Bainhira liga ne’e la’o klube hamutuk 25 mak sai hanesan fundadór no iha direitu partisipa iha kualker kongresu liga nian hodi hili lideransa foun.
Bainhira liga la’o ne’e konsege hamoris futeból iha Timor-Leste no prodús jogadór timoroan barak hodi ba kompete iha jogu internasionál sira.
LFA la’o primeiru Prezidente lidera husi Nilton Telmo Gusmão dos Santos durante époka 2016-2020. Iha tinan 2020, liga realiza nia kongresu ba dala-rua hodi muda mós naran liga nian ba Liga Futeból Timor-Leste (LFTL), iha kongresu dala-rua ne’e fundadór no klube sira deside Nilton Gusmão mak re-eleitu ba Prezidente LFTL mandatu tinan lima 2020-2024.
Maibé Nilton la konsege asume nia kna’ar ne’e to’o remata tanba iha tinan 2022 ne’e, Nilton deside rezigna-aan tanba fallansu balun entre Federasaun Futeból Timor-Leste (FFTL) ho LFTL.
Bainhira Nilton rezigna-aan liga la’o de’it ho Prezidente Interinu ate agora no liga mós paradu durante tinan tolu nia laran ona.
Notísia Relevante: Karketu DILI FC sólidu no preparadu kompete iha liga époka 2025
Jornalista : Hortencio Sanchez
Editór : Cancio Ximenes