DILI, 16 janeiru 2025 (TATOLI)–Sekretäriu Jerál klube primeira divizaun no klube kampiaun Liga Futeból Timor-Leste (LFTL) époka 2022, Karketu Dili FC, Elizeu Isaac, hateten estrutura klube daudaun ne’e sólidu tebes no preparadu atu partisipa no kompete iha liga ne’ebé sei realiza iha juñu 2025 ne’e.
“Karketu, ami estrutura sira sólidu tebes. Bainhira Federasaun Futeból Timor-Leste (FFTL) no LFTL iha hanoin hamutuk reativa liga mak ami prontu atu kompete,” Sekretariu Jerál ne’e hateten ba Agência TATOLI iha Palásiu Governu, kinta ne’e.
Durante ne’e, nia hateten, klube sempre halo kontaktu ho jogadór sira-ne’ebé durante ne’e joga iha Karketu Dili FC hodi hametin unidade maske FFTL la realiza liga.
“Durante ne’e, klube sempre halo kontaktu ho jogadór sira-ne’ebé mak baibain ne’e joga iha Karketu. Ne’ebé, atu dehan de’it, ami-nia jogadór 80% preparadu hela. Hanesan Sekretáriu Jerál, ha’u prepara hela planu sira no halo tabela salariál ba jogadór sira, bainhira liga la’o karik buat hotu ita preparadu,” nia dehan.
Aleinde ne’e, Karketu Dili FC mós halo ona komunikasaun ka kontaktu ona ho jogadór estranjeiru balun hodi reforsa klube ne’e atu apoia nafatin ba klube referidu hodi mantein nia títulu kampiaun.
“Ita iha jogadór estranjeiru balun ne’ebé ami seidauk bele fó sai loloos. Jogadór estranjeiru tenke iha para jogu ne’e bele la’o ho ánimu no kompetitivu. Ita mós sei bolu tan jogadór selesaun nasionál balun, hanesan Claudio Osorio, 90% nia sei joga husi Karketu tanba nia iha kontaktu ho ami kle’ur ona,” nia hateten.
Tuir oráriu tentativa ne’ebé FFTL deside katak liga atu realiza iha fulan-juñu tinan ne’e, nia hatán, tuir regra futeból ne’e tempu ne’ebé termina ne’e badak tebes maibé klube sei esforsu oinsá prienxe prosesu sira-ne’e hotu.
“Liga futeból atu hala’o iha fulan-juñu, kuandu ita atu ko’alia futeból lolos ne’e tempu ida kurtu tebes. Maibé, ita hatene katak ita-nia futeból foin mak sai husi situasaun ida difisíl tebes, entaun ita hotu iha dever atu kontribui no fó apoiu ba ita-nia Prezidente eleitu Nilton Gusmão ne’ebé ho paixaun boot hakarak hamoris ita-nia liga rai-laran,” Elizeu hateten.
Iha fatin hanesan, jogadór Claudio Osorio hateten nia parte hetan ona kontaktu husi jerente Karketu Dili FC atu joga hamutuk ho klube jigante Dili nian ne’e.
“Loos! Ha’u antes ne’e hetan kontaktu ona husi Karketu atu joga ho klube ne’e, ha’u mós promete ona ba Karketu katak bainhira ha’u iha Timor, klube ne’ebé ha’u joga ne’e mak Karketu. Ha’u Karketu forever,” nia dehan.
Klube sira-ne’ebé mak hamahan-aan iha primeira divizaun mak hanesan klube AD, SLB Laulara, Karketu Dili FC, Emannuel FC, Assalam FC, Aitana FC, DIT FC no AS Ponta Leste.
Klubu sira-ne’ebé mak hamahan aan iha segundu divizaun mak hanesan Nagardjo FC, Atletico Ultramar/Coração, Academica FC, Zebra FC, Kablaki FC, Lika-Lika Lemorai FC, AS Marca, Santa Cruz FC no FIEL FC.
Notísia Relevante: Prezidente FFTL enkoraja klube primeira-segunda divizaun prepara-aan tuir liga
Jornalista : Hortencio Sanchez
Editór : Cancio Ximenes
