DILI, 15 janeiru 2025 (TATOLI)–Prezidente Federasaun Futeból Timor-Leste (FFTL) Nilton Telmo Gusmão dos Santos enkoraza klube sira primeira no segunda divizaun Liga Futeból Timor-Leste (LFTL) hahú prepara-aan tuir liga, tanba tuir planu atividade desportiva ne’e sei realiza iha juñu 2025.
“Klube sira haree prepara-aan ona ba, tanba atividade liga sei la’o iha tinan ida-ne’e. Loos, ha’u komprende di’ak klube sira-nia kondisaun, sira-nia difikuldade maibé hanesan Prezidente FFTL, buat ne’ebé ita hakarak tenke hatene hotu difikuldade sira-ne’ebé iha no klube sira hasoru,” Nia hateten ba Agência TATOLI liuhusi programa “Entrevista Eskluzivu” ho topiku “Planu no Prioridade Durante Mandatu” iha estúdiu Faról, kinta ne’e.
Maske nune’e, nia rekoñese sei halo esforsu hotu ne’ebé la liu FFTL nia kbiit no sei responde saida mak klube sira hakarak, atu nune’e liga bele la’o ho susesu.
“Ita tenke halo buat hotu tuir ita-nia kbiit, importante liu mak ita tenke fó andamentu ba ita-nia programa sira mak importante. Nune’e, ha’u mós husu ho hakruuk ba Prezidente klube hotu atu kontribui iha prosesu ida-ne’e. Tanba, tinan ida-ne’e tinan ida-ne’ebé kursiál tebes, ita tenke realiza programa hirak ne’e hodi prienxe rekezitu ne’ebé mak Federation International Football Assosiation (FIFA) inpoin mai ita,” nia hateten.
Nia hatutan, programa sira hotu ne’ebé FIFA haraik ba FFTL tenke realiza ho másimu, nune’e bele hetan nafatin konfiansa husi FIFA.
Prezidente Klube primeira divizaun LFTL Assalam FC, Ipólito Soares, hateten sente kontente ho Prezidente FFTL, Nilton Gusmão, nia inisiativa no programa prioridade hodi realiza hikas liga futeból iha rai-laran.
“Ami klube futeból sente kontente bainhira Prezidente FFTL hakarak hamoris fali liga, liga tenke la’o duni iha tinan ida-ne’e nia laran,” Prezidente Assalam ne’e hateten.
Maibé, nia dehan, nia parte la aseita desizaun Prezidente FFTL nian ne’ebé tuir planu atu realiza liga iha fulan-juñu ba oin tanba konsidera tarde demais.
“Liga ne’e tenke la’o sedu ona, ita labele hahú iha fulan-juñu ne’e, ha’u hanoin tarde demais ona. Ha’u-nia hanoin, ita tenke hahú iha fulan-marsu nia rohan ou inisiu fulan-abríl ne’e di’ak. Se ita komesa iha fulan-juñu ne’e iha ona tinan nia klaran. Ami-nia preparasaun fulan ida ka rua hanesan ne’e natoon ona. Ne’e, ami klube nia sujestaun ba Prezidente FFTL,” nia dehan.
Kona-ba preparasaun Assalam FC hahú rekolla ona nia jogadór sira husi nasionál no internasionál atu haforsa klube ne’e durante époka 2025.
“Assalam FC hahú ona rekolla nia jogadór sira. Ita iha ona jogadór na’in-neen (6) husi estranjeiru ne’ebé sei reforsa Assalam FC. Sira kontaktu beibeik ha’u maibé ita-nia kalendáriu liga seidauk iha, entaun ha’u seidauk fó serteza ba sira. Maibé, kalendariu liga fó sai ona mak ha’u sei kontaktu sira. Jogadór estranjeiru ne’e mai husi nasaun Argentina, Brazíl no Canada,” nia hateten.
Iha fatin sleuk, Sekretáriu Jerál klube primeira divizaun LFTL, Domingos Caeiro, hateten SLB preparadu atu kompete liga époka ida-ne’e maibé sei halo selesaun rigirozu ba jogadór sira.
“Normalmente, SLB sempre preparadu. Maibé, agora ami tenke halo selesaun rigirozu ba jogadór sira, maibé ami konfirmadu atu partisipa iha liga ne’e,” nia hateten.
Nia hatutan, bainhira LFTL deside kalendáriu jogu iha fulan-juñu, di’ak-liu ba klube sira atu halo preparasaun ho másimu.
“Jogu hala’o iha fulan-juñu ne’e ba ami di’a- liu, atu nune’e jogu ne’e bele to’o fulan-setembru 2025, ita kontinua kedas ho Super Tasa no Tasa 12 de Novembru,” nia dehan.
Aleinde ne’e, jogadór defeza husi klube primeira divizaun LFTL AS Ponta Leste, Jaimito António da Costa Soares, sente kontente bainhira rona katak FFTL no LFTL iha ona planu atu reativa liga futeból iha rai-laran.
“Nu’udar jogadór sente kontente tebes, tanba ita-nia liga atu la’o fali ona. Durante tinan hira mak liga la la’o. FFTL ho LFTL iha hanoin hanesan ona atu realiza liga, ami jogadór kontente tebes,” nia hateten.
Tanba ne’e, nia nafatin kuidadu nia kondisaun no preparadu, nune’e bainhira liga la’o ne’e nia parte prontu atu kompete liuhusi reforsa hikas nia klube AS Ponta Leste.
“Ha’u sei kuidadu aan nafatin, atu nune’e bele kompete iha liga ne’ebé atu la’o iha tempu badak. Maske durante ne’e liga laiha maibé hanesan jogadór, ha’u sempre hala’o treinamentu individu hodi prepara aan. Bainhira liga la’o, hau prontu reforsa no hatudu jogu di’ak iha ha’u-nia klube,” nia dehan.
Klube sira-ne’ebé hamahan-aan iha primeira divizaun mak hanesan AD. SLB Laulara, Karketu Dili FC, Emannuel FC, Assalam FC, Aitana FC, DIT FC no AS Ponta Leste.
Entretantu, klube sira-ne’ebé hamahan-aan iha segundu divizaun mak hanesan Nagardjo FC, Atletico Ultramar/Coração, Academica FC, Zebra FC, Kablaki FC, Lika-Lika Lemorai FC, AS Marca, Santa Cruz FC no FIEL FC.
Notísia relevante: Nilton Gusmão eleitu ba Prezidente FFTL no promete hamoris liga rai-laran
Jornalista : Hortencio Sanchez
Editór : Cancio Ximenes