VIQUEQUE, 30 janeiru 2025 (TATOLI)—Prezidente Kâmara Komérsiu Indústria Timor Leste (CCITL, sigla portugés) munisípiu Viqueque, Florencio Guterres da Costa, informa CCITL Viqueque preparadu prontu apoiu polítika Governu sentrál ba implementasaun podér lokál no dezentralizasaun iha Viqueque.
Notísia Relevante: CCITL Viqueque sei utiliza sistema demo plot prodús hare variedade nakroma
“Ha’u nu’udar reprezentante setór provadu sira iha munisípiu ida-ne’e, ami-nia haree polítika Governu nian ba implementasaun poder lokál no dezentralizasaun administrativa, ha’u sente ida-ne’e di’ak-liu. Tanba, sei fó benifisiu ba ita, ita bele hatene reseita munisípiu nian tanba durante ne’e taxa sira-ne’ebé ita selu ba hotu nasionál ita lahatene. Maibé, podér lokál ne’e ita bele hatene munisípiu ninia reseita,” Florencio Guterres da Costa hateten ba Agência Tatoli, iha ninia rezidénsia, iha Mersida, postu Viqueque Vila, ohin.
Ba implementasaun podér lokál no dezentralizasaun ne’e, nia dehan, setór privadu sira husi estranjeiru mai investe karik lalika hein tan, ne’ebé ba polítika ida-ne’e setór privadu prontu no preparadu apoiu Governu sentrál no autoridade lokál hodi simu podér lokál no dezentraliazaun iha munisípiu Viqueque.
“Ba future, akontese implementasaun podér lokál, CCITL prefere Governu sentrál prepara sistema sira atu setór privadu estranjeiru sira mai bele investe iha munisípiu sira sai fasil liután. Atu nune’e, ita mós bele halo dezenvolvimentu iha ita-nia munisípiu rasik,” nia hateten. akresente
Tuir nia, investimentu daudaun la’o iha Viqueque, CCITL implementa programa setór agrikultura hodi uza sistema demo plot hodi kuda haree, empreza lokál sira seluk ne’e sira loke loja, abastementu, guest house no seluk tán.
“Se planta LNG Beço mak realiza karik, ita bele loke investimentu boot maibé planta LNG to’o agora ita seidauk rona loos. Tanba ne’e, ami seidauk hanoin halo investimentu boot,” nia hateten.
Ba implementa podér lokál no dezentralizasaun nia rekomenda, autoridade lokál fó hanoin ba Governu sentrál oinsá fasilita empreza lokál sira asesu kréditu husi banku sira ho jurus ne’ebé razoavél nomós halakon sistema burokrasia, atu empreza sira fasil hetan lisensiamentu nian.
“Loke mós balkaun iha munisípiu Viqueque hanesan foin lalais ita lansa iha munisípiu Baucau, hodi fasilita ita-nia emprezáriu sira. Tanba, durante ne’e ha’u haree empreza sira lakon tempu ne’e iha burokrasia, liuliu hasai lisensa no asesu ba kréditu iha banku. Ajuda setór privadu sira hodi loke investimentu barak iha Viqueque loke kampu traballu ba ita-nia joven sira. Atu nune’e ita labele dependénsia haruka ita-nia ema ba servisu iha rai-li’ur, hodi ita mós sente no goja ukun aan ne’e,” nia dehan.
Nune’e, nia husu Governu sentrál no autoridade lokál fó apoiu nafatin CCITL hodi la’o hamutuk tanba hahú husi ukan aan husi tinan 2022 to’o 2025, buat barak mal seidauk halo liuliu ba dezenvolvimentu.
“Tan ne’e, ita hamutuk hodi halo netik buat ruma iha munisípiu no nasionál,” nia hateten.
Jornalista : Vitorino Lopes da Costa
Editór : Cancio Ximenes
