VIQUEQUE, 30 janeiru 2025 (TATOLI)-Prezidente Kamara Komérsiu Indústria Timor Leste (CCITL, sigla portugés) Viqueque, Florencio Guterres da Costa, informa programa CCITL Viqueque uza sistema demo plot K1K2 hodi halai natar tinan ida dala-rua (2) iha natar ektare lima (5) iha postu Ossú, no sei prodús hare variedade nakroma tonelada 35 iha époka 2025.
Notísia Relevante: MAPPF no CCI-TL kolleta hare ektare ida iha Ossú
“Iha epoka ida-ne’e ami-nia programa agrikultura demo plot hare sei kontinua implementa iha postu Ossu. Ami-nia alvu ba natar ektare lima ba tinan ida-ne’e toneleda 35, karik klíma udan ba tinan ida-ne’e di’ak,” Prezidente CCITL munisípiu Viqueque ne’e hateten ba Agência Tatoli, iha ninia kna’ar fatin, Viqueque Vila, tersa (28 janeiru 2025) ne’e.
Nia dehan, implementasaun programa ka sistema demo plot K1K2 ne’ebé CCITL uza ne’e servisu hamutuk ho agrikultór sira hodi sai hanesan ezemplu ida, hodi ko’alia kona-ba investimentu no nesesidade maibé haree ona ba merkadu.
“Programa agrikultura ba sistema demo plot, ami koloka tékniku agrikultura na’in-rua (2) hodi fó asisténsia téknika ba ita-nia agrikultór sira hodi implementa programa ida-ne’e,” nia dehan.
Aleinde ne’e, nia relata, kona-ba programa agrikultura uza sistema demo plot, hare ne’ebé sira kuda ne’e iha tinan 2024 hamutuk ektare lima ba etapa rua, etapa dahuluk CCITL Viqueque implementa iha janeiru to’o marsu mak kolleta.
Maibé, nia informa, CCITL hetan de’it rezultadu kolleta hetan tonelada hitu (7) no foin lalais CCITL realiza bazar baratu hodi lori ba Dili, faan iha bazar baratu ne’e komsumidór barak mak hakarak sosa maibé estoke hare mak la sufisiente.
Nune’e mós, nia dehan, ba implementasaun Sistema demo plot ne’e CCITL aplika iha tinan 2024 uza adubu órganika ba natar ektare lima (5), maibé iha faze dahuluk observa klíma udan mak estraga tanba adubu ne’ebé CCITL uza presiza loron manas, maibé iha tinan kotuk Ossú iha fulan-janeiru to’o fulan-marsu ne’e udan boot hela maibé rezultadu hare ladún di’ak.
“Nune’e, ami implementa fali iha sistema demo plot ba faze daruak nian iha Uailau, ami hahú iha fulan-maiu, kuda iha fulan-jullu no kolleta iha fulan-novembru 2024, la to’o ektare ida (0.75 ektare), maibé ninia rezultadu hare ne’ebé hetan ne’e hamutuk tonelada hitu (7),” nia hateten.
Nia hateten, implementasaun sistema demo plot iha faze daruak tama ba bailoro rendimentu di’ak kompara ba iha tempu udan hanesan iha époka dahuluk nian.
“Ha’u kompara ba ektare lima ne’e, kada ektare ida mak ita hetan tonelada hitu (7), ita konta hamutuk husi ektare lima (5) ne’e ita bele hetan tonelada 35, ” nia hateten.
CCITL nia esperansa katak ba époka 2025 ne’e sei esforsu hodi hasa’e produsaun hare husi sistema demo plot ektare lima ba tonelada 35 maibé depende fila-fali ba klíma.
“Ami-nia esperansa ba tinan ida-ne’e hasa’e produsaun hare, maibé iha Viqueque ne’e udan ladún normal no dalaruma udan hela de’it, dalaruma udan laiha, ita-nia klíma kada tinan sempre iha mudansa,” nia dehan.
Enkuantu, implementasaun sistema demo plot K1K2 ne’e CCITL uza ba setór agrikultór iha postu Ossú ne’ebé implementa husi empreza Ecevi Sangir da Ze Unipesoál, Lda no Adino Lotas Unipesoál, Lda. Kada empreza ida halo natar ektare rua (2) ho balun ho totál ektare lima (5) no akompaña husi CCITL Viqueque.
Notísia Relevante: MAPPF kolleta hare variedade nakroma ho ektare 208 iha Uatulari
Jornalista : Vitorino Lopes da Costa
Editór : Cancio Ximenes
