DILI, 30 Janeiru 2025(TATOLI) – Konsellu Ministru aprova, ohin, projetu rezolusaun Governu nian ba alterasaun daruak ba rezolusaun Governu númeru 7/2024, loron 24 fulan-Janeiru, ne’ebé kria Komisaun Ezekutiva ho intesaun atu estabelese Zona Dezenvolvimentu Ekonómiku Espesiál iha Oé-Cusse Ambenu. Projetu rezolusaun ne’e aprezenta husi Primeiru-Ministru, Xanana Gusmão.
Vise-Ministru ba Asuntu Parlamentár, Adérito Hugo da Costa, hateten alterasaun ba rezolusaun ne’e atu kontinua halo ajustamentu ba serbisu ekipa ida ne’e nian to’o fulan-Abríl.
“Alterasaun ida-ne’e estende mandatu Komisaun Ezekutiva nian ba fulan tolu tan, to’o Abríl 2025 nia rohan, hodi konsidera kompleksidade housi misaun ne’ebé atribui no nesesidade atu kompleta knaar esensiál sira ne’ebé sei hala’o hela to’o períodu ne’e nia rohan”, governante ne’e dehan iha Palásiu Governu, ohin.
Nia dehan iha estensaun ba mandatu serbisu ne’e, komisaun refererida tenke aprezenta proposta ba enkuadramentu orgániku Zona Ekonómika Espesiál iha futuru hodi garante nia inkluzaun iha preparasaun síklu orsamentál 2026 nian.
Rekorde katak Governu antes ne’e aprova ona, iha 24 Janeiru 2024, projetu daruak rezolusaun Governu nian, ho objetivu atu kria Komisaun Ezekutiva ida hodi haree ba estabelesimentu Zona Ekonómika Dezenvolvimentu Espesiál ida iha Oé-Cussse Ambeno.
Desizaun hodi kria komisaun ida-ne’e, atu konsidera katak, hafoin kuaze dékada ida dezde ninia kriasaun, projetu atu estabelese Zona Espesiál Ekonomia Sosiál Merkadu ida, hatudu inkapasidade atu kumpre objetivu sira ne’ebé propoin ona iha inísiu, hodi kria beibeik dúvida kona-ba ninia natureza, finalidade, kompeténsia no podér sira to’o ninia estinsaun.
“Populasaun la haree-hetan Zona Espesiál ne’e hanesan realidade ida ne’ebé bele atende sira-nia nesesidade, laiha dinamizasaun ekonómika, atinje ekuidade sosiál no partisipasaun efetiva komunidade lokál nian. Aleinde ne’e, jestaun Zona Espesiál dala barak konfunde ho administrasaun Rejiaun Administrativa Espesiál Oé-Cusse Ambeno nian, nune’e hamosu inserteza kona-ba ninia papél no impaktu efetivu.
Komisaun ne’e iha responsabilidade atu prepara no aprezenta ba Governu, ho prazu fulan 12, estudu detalladu ida ho objetivu atu implementa Zona Ekonómika Espesiál ida iha Oé-Cusse Ambenu, liuliu ho deskrisaun pormenorizada kona-ba ninia objetivu sira, planu implementasaun nian no orsamentu nesesáriu ba efeitu ne’e.
Antes ne’e, Governu nomeia João Mendes Gonçalves hanesan koordenadór komisaun, enkuantu dezigna Régio da Cruz Salu no Herculano de Sousa hanesan vise-koordenadór.
Notísia relevante: KM altera rezolusaun Governu kriasaun komisaun zona dezenvolvimentu Oé-cusse
Jornalista: Arminda Fonseca
Editora: Maria Auxiliadora
