DILI, 31 janeiru 2025 (TATOLI)—Prezidente Asosiasaun Arbitrajen Futeból Timor-Leste (AAFTL), Nivio da Costa Fernandes, hateten dadaun ne’e assosiasaun prepara ona árbitru ho lisensa B hamutuk na’in-36 atu dirije jogu Liga Futeból Timor-Leste (LFTL) ne’ebé tuir planu sei realiza iha fulan-abríl 2025.
Notísia Relevante: AAFTL prepara ona árbitru profisionál na’in-ualu apoiu jogu CPLP
“Ita-nia árbitru nivel B hanutuk na’in-36. Agora daudaun ne’e, ita prepara hela na’in-36 atu lidera jogu durante liga. Maibé, iha tinan ida-ne’e, ita hanoin hela atu fó formasaun nivel B atu selesiona árbitru sira mai husi Munisípiu bainhira di’ak bele apoiu tan ita nia liga,” Nivio hateten ba Agência TATOLI iha edifisiu Federasaun Futeból Timor-Leste (FFTL), Bairro dos Grilhos, sesta ne’e.
Nia dehan, assosiasaun tenta hela atu prepara árbitru hamutuk 50 hodi apoiu liga ne’ebé sei akontese iha fulan-abríl, ba sira na’in-36 ne’e fiksu ona maibé tuir regulamentu internasionál nian tenke iha árbitru 50 entaun seidauk to’o.
“Ita-nia situasaun rai-laran hanesan ne’e. Ita tenta atu hatán ba ita-nia situasaun,” Nivio tenik.
Nia hatutan, durante tinan tolu-resin ne’e árbitru Timor-Leste hetan impaktu boot bainhira laiha liga no kompetisaun futeból iha rai-laran.
“Durante ne’e, árbitru hetan impaktu boot tanba ita laiha kompetisaun futeból ne’ebé la’o ho másimu, hanesan liga la la’o ne’e impaktu makaas ba árbitru sira nia perestasaun. Maske, ita bele update hela amandamentu foun sira ba sira maibé sira rasik la hala’o atividade iha terrenu. Signifika, prestasaun sira-nian monu, maibé durante ne’e ita iha hela jogu sira hanesan Kopa Navál FALINTIL-Forsa Defeza Timor-Leste (F-FDTL) nian, jogu balun hala’o iha Dili laran mak hasa’e fali árbitru sira-nia prestasaun tanba árbitru lubuk ida mak ba lidera,” nia afirma.
Nia dehan, agora Timor-Leste iha ona estrutura Federasaun Futeból Timor-Leste (FFTL) foun, no estrutura foun ne’e apoiu tebes hodi halo preparasaun oinsá atu dirije jogu sira liga nian maibé árbitru sira preparadu naftin atu tun iha terrenu.
Tuir dadus ne’ebé iha, total árbitru iha Timor-Leste ne’ebé tuir ona formasaun hodi hetan lisensa hamutuk 671 no husi númeru ne’ebé iha inklui árbitru futsál no kampu boot nian.
Jornalista : Hortencio Sanchez
Editór : Cancio Ximenes
