Profesór iha Viqueque ne’ebé idade tama reforma hamutuk 202
VIQUEQUE, 31 janeiru 2025 (TATOLI)—Diretór Servisu Edukasaun munisípiu Viqueque, Julio Sakadura, informa profesór sira-ne’ebé hanorin iha munisípiu Viqueque ne’ebé sira-nia idade tama ba reforma ne’e hamutuk na’in-202.
Notísia Relevante: PN aprova proposta-lei reforma obrigatóriu ba FP ho idade 65
“Iha ita-nia munisípiu Viqueque, profesór sira-ne’ebé idade tama ona ba reforma ne’e sira-nia idade 60 ba leten ona. Nune’e, Governu implementa lei reforma obrigatóriu mak ita sei enfrenta menus profesór iha eskola sira liuliu Ensinu báziku no ensinu sekundáriu sira-ne’ebé iha munisípiu Viqueque,” Julio Sakadura hateten ba Agência Tatoli, iha nia kna’ar fatin iha servisu edukasaun munisípiu Viqueque, Beloi, ohin.
Nia dehan, foin daudaun ne’e profesór bolsa kandidatu na’in-124 koloka mai munisísipiu Viqeuque, maibé númeru ne’e seidauk prienxe hodi subtitui profesór idade reformadu hamutuk 202 ne’e.
“Profesór bolsa kandidatu ne’ebé ministériu koloka mai ami ne’e na’in-124. Husi númeru ne’e ita komfere ba profesór reforma ne’e sei falta barak. Tanba ne’e, ha’u ko’alia beibeik ba Ministériu Edukasaun (ME), tantu liuhusi mídia katak iha Viqueque eskola barak mak sei enfrenta menus profesór tanba iha eskola balun profesór na’in-tolu, balun na’in-haat ne’ebé presiza aumenta tan profesór,” nia dehan.
Tanba ne’e, nia dehan, bainhira lei idade reforma obrigatóriu implementa mak servisu edukasaun munisípiu Viqueque sei enfrenta ba problema profesór hodi substitui ba profesór reformadu sira-ne’ebé destaka iha eskola sira iha Viqueque.
“Kuandu akotese reforma obrigatóriu ida-ne’e, sai dezafiu ida ba ita-nia eskola sira. Se ida-ne’e akontese ita-nia Goveernu liuhusi ME tenke halo rekrutamentu hodi prienxe ba eskola sira,” nia hateten.
Kona-ba fisasaun limite idade aplikavel ba funsionáriu públiku no ajente administrativu abranje husi lei númeru 8/2004, 16 junu. Aditamentu lei númeru 8/2004, 16 juñu, norma ho objetivu konkretizasaun nesesáriu hodi fiksa limite idade hanesan kauza sesasaun relasaun serbisu iha administrasaun públika.
Tuir dadús profesór iha munisípiu Viqueque, husi bolsa kandidtu totál hamutuk na’in-124 no profesór totál hamutuk na’in-1.267 no husi númeru ne’e idade tama ba reforma hamutuk na’in-202.
Notísia Relevante: Deputadu komisaun A husu KFP implementa lei reforma obrigatóriu
Jornalista : Vitorino Lopes da Costa
Editór : Cancio Ximenes
