DILI, 05 fevereiru 2025 (TATOLI)—Instituto Para a Qualidade de Timor-Leste (IQTL) halo konsultasaun públika kona-ba ezbosu Projetu Lei Padraun Nasionál ba ajente ekonómiku sira iha Timor-Leste.
“Iha kontestu ekonomia integrada, parte importante ida mak importasaun no esportasaun ba produtu hotu-hotu ne’ebé tenke halo armonizasaun no tenke prenxe rekizitu hirak ne’ebé mak iha Tecnhical Regulation Standardization no Conformity Assessment Procedures hodi lori bá kompete iha merkadu, nune’e bele garante no responde ba nesesidade diversifikasaun ekonomia TL nian iha ámbitu pós adezaun ba World Trade Organization (WTO) no adezaun ba ASEAN,” Prezidente IQTL, Izilda Manuela da Lúz Pereira Soares dehan bainhira konsulta ezbosu referidu ba ajente ekonómiku sira iha Becora, Dili, kuarta ne’e.
Iha fatin hanesan, Koordenadór Jerál iha Ministériu Koordenadór Asuntu Ekonómiku, Jorge Martins hateten IQTL hahú tan faze importante ida kona-ba futuru polítika ekonomia Timor-Leste.
Notísia relevante: MTKI hamosu IQTL atu implementa sistema nasionál kualidade
“Lei nasionál ba normalizasaun no padronizasaun mak sai padraun nasionál hodi asegura dezenvolvimentu ekonómiku no tenke sai duni padraun ida-ne’ebé bele garante estabilidade no integrasaun Timor-Leste nian ba merkadu rejionál no globál,” nia esplika.
Nia haktuir, lei nasionál ba normalizasaun ne’e mós sai pilár ida ba dezenvolvimentu ekonómiku ba povu.
“Liuhusi estabilidade padraun nasionál ne’ebé forte, ita asegura katak produtu no serbisu sira ne’ebé prodús iha Timor-Leste, sei fó benefísiu ba ita. Maibé, la’os de’it ba indústria sira ne’ebé orientadu ba esportasaun, maibé mós ba konsumidór sira ne’ebé asesu ba sasán no servisu sira ho kualidade aas,” Jorge hateten.
IQTL, I.P. nu’udár jestór ba laboratóriu sientífiku ne’ebé iha kna’ar halo kalibrasaun ba ekipamentu laboratoriu hotu, tanba ne’e IQTL instala ona ekipamentu ba área sira hanesan massa, volume, temperatura, umadita no hahán.
IQTL kria husi Dekretu-Lei Nú.10/2018, 9 de Abríl, hetan alterasaun ho Dekretu-Lei Nú.15, 2021 de 15 de Setembro, kona-ba kompeténsia ho natureza nu’udár autoridade reguladora nasionál ba metrolojia, normalizasaun no kualifikasaun, iha autononia administrativa, finanseira no patrimóniu ne’ebé tutela iha Ministériu Koordenadór Asuntu Ekonómiku (MCAE-sigla portugés).
Ajente ekonómiku hotu-hotu ne’ebé maihusi nasionál no internasionál, kontribui maka’as ba ezbosu lei ida-ne’e mak hanesan embaixada, ajénsia internasionál sira husi Austrália, Portugal, Xina, Indonézia, Nova Zelándia, Singapura no mós ajénsia nasionál sira hanesan sosiedade sivíl, CCI-TL, AEMTL, Grupu Tane Produtu Lokál.
Jornalista: Felicidade Ximenes
Editór: Xisto Freitas da Piedade
