DILI, 06 Fevereiru 2025 (TATOLI)-Eleitór suku lima hamutuk 6.394 sei partisipa iha eleisaun segunda volta ne’ebé sei realiza iha loron 10 Fevereiru 2025.
“Ohin loron 6 Fevereiru ita halo distribuisaun materiál no iha loron 9 sei halo distribuisaun ba sentru votasaun ne’ebé atu realiza eleisaun, nune’e iha 10 Fevereiru akontese eleisaun”, Diretór Jerál Sekretariadu Tékniku Administrasaun Eleitorál (STAE), Elviro Fernandes Moniz, dehan iha nia diskursu, iha STAE Kaikoli, Dili, kinta ne’e.
Responsável STAE nasionál relata livru ne’ebé atu distribui ba munisípiu tolu hanesan Manatutu, ba suku Iliheu 24 ho folla 1.200. Ermera ho suku rua mak Poetete Lodudu livru 28, folla 1.400, no suku Poetete Vila ho livru 65, folla 3.259.
Enkuantu, Rejiaun Administrasaun Espesiál Oekusi (RAEOA), nia dehan suku Mone-Meko ho livru 30, folla 1.500 no suku Kutete livru 28, folla 1.400.
Vise Prezidente Komisaun Nasionál Eleisaun (CNE), Domingos Barreto, hatete STAE hamutuk ho CNE halo distribuisaun materiál eleisaun nian, nune’e husu parte hotu tau liman hamutuk hodi hetan susesu.
“Ita-nia kooperasaun no servisu hamutuk ida-ne’e mak ita bele atinje no hetan susesu iha volta daruak nian, husu parte ne’ebé atu transporta materiál ba munisípiu tenke ho kuidadu nune’e to’o ho di’ak no susesu iha fatin destinasaun”, nia dehan.
Reprezentante Ministériu Administrasaun Estatál (MAE), Direitu Nasionál Apoiu Administrasaun Suku (DNAAS), Celestino Marques, hatete iha primeira volta la’o susesu no espera iha segunda volta parte hotu servisu no mellora liután.
“Rezultadu eleisaun primeiru volta ne’ebé la’o ho susesu sai referensia, nune’e segunda volta bele mellora liután servisu. Husu ba ekipa responsável atu akompaña transportasaun materiál ba fatin destinasaun”, nia dehan.
Komandante Polísia Nasionál Timor Lorosa’e (PNTL), Superintendente Xefe, António Mauluta, hatete atu garante seguransa transportasaun la’o di’ak to’o realizasaun eleisaun mak komandante munisípiu tenke asegura no halo kontrola másima, nune’e eleisaun la’o ho di’ak.
“Atu asegura materiál eleisaun ho di’ak to’o fatin, maibé dahuluk ita ida-idak tenke asegura ita-nia aan nune’e mak bele asegura materiál. Tanba iha lei ne’e dehan salva aan, salva sasán no salva ema seluk, ida-ne’e mak foin bele iha susesu ba transportasaun ne’e. Nune’e komandante munisípiu tenke halo kontrolu ida ba ekipa STAE ho CNE ne’ebé iha terrenu”, nia fó hanoin.
Orsamentu ba eleisaun suku 18 hamutuk $419.215,50, kompostu hosi servisu profisionál $127.428,00.
Lojístika eleitorál $22.456,00, enkargu instalasaun $1.940,00, aluger $6.865,00 1, kombustivel $20.000,00, formasaun no semináriu $40.620,00, dezlokasaun nasionál-munisipál-nasionál $136.400,00, imprime (akta, lista pursentu ida, manuál $63.506,50, formasaun, aktas, kartaun identidade, poster, banner, buletin votu).
Estabelesementu suku foun iha Timor laran bazeia ba lei suku númeru: 19/2023 ne’ebé previstu iha artigu 91, fó kompeténsia ba Ministériu Administrasaun Estatál (MAE) deside kriasaun suku foun referidu.
Notísia relevante: Eleisaun Suku husi munisípiu ualu iha 2025
Jornalista : Osória Marques
Editor : Rita Almeida
